Качанава: работа над заканадаўствам вядзецца зыходзячы з інтарэсаў людзей
22 ліпеня, Гродна . Парламентарыі вядуць работу над удасканаленнем заканадаўства зыходзячы з інтарэсаў людзей, адзначыла старшыня Савета Рэспублікі Нацыянальнага сходу Наталля Качанава на сустрэчы з калектывам Гродзенскага абласнога клінічнага кардыялагічнага цэнтра пасля ўрачыстага адкрыцця новага дыягнастычнага корпуса,
«Пакланяюся перад людзьмі, якія працуюць у сістэме аховы здароўя. Яны прысвяцілі сябе самай высакароднай місіі — аказваць дапамогу людзям, захоўваць ім жыццё. Пры гэтым вам самім берагчы сябе няпроста: чалавечыя пакуты і боль вы прапускаеце праз сябе. Таму і ўмовы, і зарплата ў вас павінны быць дастойнымі», — з такіх слоў Наталля Качанава пачала размову з работнікамі кардыяцэнтра.
Яна адзначыла, што парламентарыям важна выязджаць на месцы, размаўляць з людзьмі, ведаць сітуацыю. Выязныя прыёмы грамадзян, сустрэчы ў калектывах, прамыя тэлефонныя лініі — зыходзячы з гэтага складаецца работа над удасканаленнем заканадаўства.
«Ужо не першы год ідзе работа над Кодэксам аб ахове здароўя, — сказала Наталля Качанава. — Мы павінны дакладна разумець, што яшчэ патрэбна ў ім прапісаць, каб у сістэме аховы здароўя ўсё працавала эфектыўна. З таго, з чым звяртаюцца да нас людзі, якія вы задаяце пытанні, мы выбудоўваем свае прапановы».
Яна адзначыла, што Прэзідэнт паставіў задачу, каб усе заканадаўчыя акты праходзілі экспертызу ў Савеце Рэспублікі. Яны разглядаюцца на пасяджэннях экспертнага савета.
Уся работа дзеля дабрабыту жыхароў Беларусі магчыма толькі ва ўмовах міру, адзначыла Наталля Качанава. «Парламентарыі інтэнсіўна працуюць над тым, каб захоўваць мірнае жыццё ў Беларусі, узаемадзейнічаюць з калегамі з розных краін. Сыходзіць аднапалярны свет, яму на змену прыходзіць шматпалярны, але не ўсе з гэтым згодны і процідзейнічаюць гэтаму гістарычнаму працэсу. Як гаворыць наш Прэзідэнт, мы абавязаны зрабіць усё, каб захаваць мір на беларускай зямлі, прадаўжаць стабільнае развіццё», — падкрэсліла старшыня Савета Рэспублікі.
«Мы жывём у адпаведнасці са сваімі сродкамі, — адзначыла Наталля Качанава. — І нягледзячы на тое, што не валодаем вялікімі аб’ёмамі нафты, прыродным газам, жыццё становіцца лепшым з кожным годам. Дастатак у магазінах, развіццё высокатэхналагічнай медыцыны, добрая адукацыя — усё гэта бачна простым вокам».
Як падкрэсліла старшыня Савета Рэспублікі, дзяржава — гэта мы, кожны з нас. І ўсе павінны разумець, што толькі ўносячы свой уклад, шчыра і добрасумленна працуючы на сваім месцы, можам будаваць паспяховае жыццё для сябе і сваіх дзяцей.
Фота Леаніда Шчаглова
