Як галоўная пляцоўка «Славянскага базару» адзначыла сваё 30-годдзе на XXVII фестывалі мастацтваў
Фота з архіва 7 ліпеня, Мінск . Да XXXV Міжнароднага фестывалю мастацтваў «Славянскі базар у Віцебску» застаецца 9 дзён. БЕЛТА прапануе акунуцца ў рэтраспектыву: штодзённа ў архіўных матэрыялах расказваем пра самыя яркія моманты мерапрыемства па гадах. Сёння — пра фестываль 2018 года.
У XXVII Міжнародным фестывалі мастацтваў «Славянскі базар у Віцебску» прынялі ўдзел прадстаўнікі 41 краіны. З 9 па 18 ліпеня на 22 пляцоўках горада было арганізавана больш за 150 мерапрыемстваў.
Гала-канцэрт урачыстага адкрыцця традыцыйна адбыўся на галоўнай канцэртнай пляцоўцы форуму — у Летнім амфітэатры, які адсвяткаваў сваё 30-годдзе. Прэзідэнт Беларусі Аляксандр Лукашэнка ў прывітальным слове адзначыў, што на «Славянскім базары» заўсёды пануе ўнікальная атмасфера міжнацыянальнага сяброўства, якое існуе па-за дзяржаўнымі межамі, палітычнымі і рэлігійнымі поглядамі і перакананнямі. Віцебскі фестываль служыць самым высакародным мэтам. Спецыяльную прэмію кіраўніка дзяржавы «Праз мастацтва — да міру і ўзаемаразумення» Аляксандр Лукашэнка ўручыў народнай артыстцы Казахстана Розе Рымбаевай.
Пятнаццаты раз прайшоў Дзень Саюзнай дзяржавы Беларусі і Расіі. Лаўрэатамі прэміі СД у галіне літаратуры і мастацтва за 2017-2018 гады сталі народны артыст Расіі кампазітар Алег Іваноў, аўтарскі калектыў у складзе народнага артыста Расіі, дырыжора Валерыя Палянскага і заслужанага работніка культуры Расіі Аляксандра Шаніна, а таксама народны артыст Савецкага Саюза, балетмайстар Валянцін Елізар’еў.
У XXVII Міжнародным конкурсе выканаўцаў эстраднай песні «Віцебск-2018» прынялі ўдзел выканаўцы з 21 краіны, упершыню выступілі артысты з Гвінеі і Егіпта. Старшынёй міжнароднага журы стаў кампазітар, народны артыст Расіі, Малдовы і Украіны, аўтар-выканаўца Аляксандр Марозаў. Конкурсная праграма складалася з паўфіналу і фіналу, Гран-пры забраў выканаўца з Румыніі. Спецыяльнай прэміяй імя Уладзіміра Мулявіна «За лепшае ўвасабленне нацыянальнай тэмы, высокае выканальніцкае майстэрства» ўзнагароджана прадстаўніца Кубы. 
У XVI Міжнародным дзіцячым музычным конкурсе «Віцебск» удзельнічалі юныя артысты з 20 краін. Упершыню сваё вакальнае майстэрства прадэманстравалі выканаўцы з Вялікабрытаніі і Канады. Лаўрэатам Гран-пры стаў прадстаўнік Украіны.
У рамках «Славянскага базару» свае юбілеі адзначылі выдатныя артысты. Упершыню на Міжнародным фестывалі мастацтваў Аляксандр Марозаў правёў свой сольны канцэрт, прымеркаваны да асабістага 70-годдзя і 50-годдзя творчай дзейнасці. Акрамя таго, поўную залу сабрала юбілейная праграма кампазітара Ігара Лучанка, на якой прагучала больш за два дзясяткі яго песень, што сталі сапраўднымі жамчужынамі музычнай творчасці. Пераможца праекта «Голас» Сяргей Валчкоў таксама прадставіў канцэрт, прысвечаны свайму 30-годдзю і 5-годдзю кар’еры.
Юбілейная фотавыстава «Імгненні стагоддзя» Беларускага тэлеграфнага агенцтва адлюстравала асноўныя вехі гісторыі Беларусі з 1918 года па цяперашні час. Праект «Лялечны квартал» у 2018 годзе адзначыў пяцігоддзе. Упершыню на Міжнародным фестывалі мастацтваў выступіў Маладзёжны беларуска-расійскі сімфанічны аркестр, які святкаваў свой 10-гадовы юбілей.
Не застаўся без увагі і гала-канцэрт «International voice in Vitebsk», на якім выступілі лаўрэаты розных фестываляў з больш як 13 краін — членаў Сусветнай асацыяцыі фестываляў (WAF).
Плошча Перамогі стала асноўнай пляцоўкай мерапрыемстваў Дня моладзі, які ў 2018 годзе праходзіў на працягу двух дзён. Праграма была насычана канцэртамі, танцавальнымі і спартыўнымі спаборніцтвамі, конкурсамі музыкантаў і рамеснікаў. З 12 па 16 ліпеня чацвёрты раз адбыўся Фэст вулічнага мастацтва «На сямі вятрах», у якім прынялі ўдзел 131 творчы калектыў і больш за 600 удзельнікаў з Беларусі, Расіі, Украіны і Швецыі. У праграму ўвайшло каля 80 мерапрыемстваў розных напрамкаў і жанраў.
На гала-канцэрце ўрачыстага закрыцця выступілі артысты і творчыя калектывы з Беларусі, Італіі, Кубы, Латвіі, Расіі, Украіны, Францыі. 
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца ўжо 14 ліпеня.
Фота з архіва
