«Гарачы хайп для збеглай апазіцыі». Крутой пра неапраўдана раздутую тэму працоўных мігрантаў у Беларусі
Дзмітрый Крутой 18 ліпеня, Мінск . Тэма прыцягнення ў Беларусь працоўных мігрантаў неапраўдана раздута апанентамі ў інфармацыйным полі. Аб гэтым заявіў журналістам кіраўнік Адміністрацыі Прэзідэнта Беларусі Дзмітрый Крутой,
«Зразумела, гэта нейкі гарачы хайп для нашай збеглай апазіцыі. Якраз такі, як быў з Пакістанам, — сказаў Дзмітрый Крутой. — У нас у рэспубліцы шмат гадоў працуе сістэма знаходжання працоўных мігрантаў. З улікам шматгадовага вопыту ў гэтай сферы літаральна нядаўна ўрадам па рашэнні Прэзідэнта прынята абноўленая пастанова, дзе мы ўлічылі ўсе напрацоўкі нашых ведамстваў — ад МЗС, МУС да нашых рэгіянальных улад. Гэта тое, што датычыцца мігрантаў у цэлым. Сітуацыя і схема абсалютна зразумелая».
Ён растлумачыў, што ў аснове гэтай сістэмы — заяўка кіраўніка той ці іншай арганізацыі. «Такія заяўкі фарміруюцца. Ёсць адпаведныя кадравыя агенцтвы і ў нас, і ў краіне, адкуль гэтыя працоўныя мігранты збіраюцца да нас прыехаць. Ёсць фільтр нашых пасольстваў, якія абавязкова праглядаюць гэтыя спісы, правяраюць людзей па адпаведных базах. У першую чаргу іх добранадзейнасць з пункту гледжання ўчыненых правапарушэнняў. Потым ужо яны прыязджаюць да нас у краіну. З гэтым кіраўніком, які падаваў на іх заяўку, заключаюць працоўны дагавор, дзе дакладна прапісваюцца ўсе ўмовы, звязаныя з заработнай платай, выпрацоўкай, прэміямі», — растлумачыў кіраўнік Адміністрацыі.
Дзмітрый Крутой таксама звярнуў увагу на такі важны аспект, як забеспячэнне працоўных мігрантаў умовамі для пражывання. У гэтым плане выкарыстоўваюцца розныя формы жыллёвага найму — ад гасцініц, інтэрнатаў да арэнднага жылля і новапабудаванага. «Тут яны (мігранты. — Заўвага БЕЛТА) маюць у прынцыпе тыя ж абсалютна ўмовы, што і нашы беларусы. Калі гэта пустуючыя дамы, і яны ў рамках раёнаў трапляюць у адпаведную базу, то выдзяляюцца рэсурсы і гэтыя дамы прыводзяцца ў парадак», — сказаў ён.
Акрамя таго, калі людзі прыязджаюць сем’ямі, то таксама прымаюцца ўсе неабходныя меры для сацыялізацыі членаў сем’яў работнікаў. Жонцы таксама прадастаўляецца работа, а дзецям — магчымасць наведвання школы або дзіцячага сада. «Ніякай дыскрымінацыі тут няма. Абсалютна зразумелая і зладжаная сістэма, якая працуе шмат гадоў», — падкрэсліў Дзмітрый Крутой.
