Футбалісты Кюрасаа дэбютуюць на чэмпіянаце свету матчам з Германіяй
Фота з адкрытых крыніц 14 чэрвеня, Мінск . На футбольным чэмпіянаце свету адбудуцца чарговыя сустрэчы першага тура,
У групе E футбалісты зборнай Кюрасаа ў сваім дэбютным паядынку на планетарным форуме сустрэнуцца ў амерыканскім Х’юстане з чатырохразовым чэмпіёнам свету камандай Германіі (пачатак у 20.00). У Філадэльфіі Кот-д’Івуар згуляе з эквадорцамі (пачатак у 23.00).
У стартавым матчы квартэта F футбалісты Нідэрландаў у Арлінгтане будуць сапернічаць з Японіяй. У мексіканскім Мантэрэі шведы згуляюць з камандай Туніса.
Беларускія балельшчыкі могуць сачыць за гульнямі сусветнага першынства ў прамым эфіры тэлеканала «Спорт ТБ».
Напярэдадні пяціразовыя чэмпіёны свету бразільцы не змаглі адолець мараканцаў, завяршыўшы сустрэчу ўнічыю — 1:1. У іншым паядынку групы C былыя сапернікі беларусаў у кваліфікацыі сусветнага першынства шатландцы перамаглі каманду Гаіці — 1:0. У квартэце D аўстралійцы нечакана перайгралі турэцкіх футбалістаў з лікам 2:0, а зборная ЗША разграміла парагвайцаў — 4:1.
Групавы этап завершыцца 28 чэрвеня, пасля чаго ў плэй-оф выйдуць па дзве лепшыя каманды з 12 квартэтаў, а таксама восем лепшых зборных, якія занялі трэція месцы. Матчы 1/16 фіналу адбудуцца 28 чэрвеня — 4 ліпеня, сустрэчы 1/8 фіналу пройдуць 4-7 ліпеня, чвэрцьфіналы — 9-12 ліпеня, паўфінальныя гульні назначаны на 14 і 15 ліпеня, матч за бронзу пройдзе 18 ліпеня ў Маямі, а 19 ліпеня ў Нью-Ёрку адбудзецца вырашальны паядынак за чэмпіёнскі тытул.
Фінальны турнір цяперашняга сусветнага першынства ўпершыню ў гісторыі праходзіць на арэнах адразу трох краін — ЗША, Канады і Мексікі. Таксама ўпершыню ў фінальнай стадыі сусветнага чэмпіянату ўдзельнічаюць 48 каманд. Дэбютантамі фіналу ЧС з’яўляюцца зборныя Узбекістана, Кюрасаа, Каба-Вэрдэ і Іарданіі.
Папярэдні чэмпіянат свету праходзіў у Катары ў 2022 годзе. У фінальным паядынку зборная Аргенціны адолела ў серыі пасляматчавых пенальці каманду Францыі — 4:2 (гульнявы час — 3:3), у матчы за бронзу харваты перамаглі мараканцаў з лікам 2:1. Зборная Бразіліі пяць разоў станавілася чэмпіёнам свету, у Італіі і Германіі па чатыры тытулы, тры — у Аргенціны, па два — у Францыі і Уругвая, па адным разе перамагалі футбалісты Англіі і Іспаніі.
