Фарбы з зямлі Асвенціма і глыбокія эмоцыі чалавека: у Брэсце завяршыўся пленэр «Твар гісторыі»
3 ліпеня, Брэст . Каля 40 жывапісных і графічных карцін і мастацкіх фатаграфій стварылі беларускія, нямецкія і расійскія мастакі на пленэры «Твар гісторыі» ў Брэсцкай вобласці. Аб гэтым паведамілі арганізатары.
Міжнародны пленэр прысвечаны 85-годдзю пачатку Вялікай Айчыннай вайны. Да творчых выездаў па Брэсце і бліжэйшых раёнах далучыліся каля 15 мастакоў з Беларусі, Расіі і Германіі. Еўрапейцы прыехалі ў нашу краіну па бязвізе, яны госцяць з 20 чэрвеня. Інтэрнацыянальная група пабывала ў гістарычных мясцінах — у мемарыяльных комплексах «Брэсцкая крэпасць-герой» і «Драмлёва» ў Жабінкаўскім раёне, на алеі памяці ў аграгарадку Мухавец Брэсцкага раёна. У гарадскім пасёлку Дамачава мастакі наведалі месца расстрэлу нямецка-фашысцкімі захопнікамі выхаванцаў дзіцячага дома і ўстаноўлены ў памяць аб гэтай падзеі манумент смутку «Пратэст».
Вынікам пленэру стала выстава ў Мастацкім музеі — філіяле Брэсцкага абласнога краязнаўчага музея. 
«Для нас зрабілі вельмі насычаную праграму. Для мяне, напэўна, самым эмацыйным момантам было наведванне вёскі Ражкоўка. (Гісторыя ўзнікнення храма звязана з цудоўным выратаваннем жыхароў у час Вялікай Айчыннай вайны. — Заўвага БЕЛТА). Проста ўдар быў. Я — веруючы чалавек, хацелася храм падняць над усім светам. Я там малявала. Пяты форт выклікаў уражанне, увогуле — усе месцы. Калегі з Германіі дзяліліся ўражаннямі. Для іх Дамачава быў самым эмацыйным момантам. Бачыць іх рэакцыю, іх вочы было вельмі кранальна», — падзялілася расійская мастачка Маргарыта Дзмітрыева. Паводле яе слоў, інтэрнацыянальная група працавала дружна і ў адзінстве. 
Мастачка з вялікай цеплынёй адзываецца аб Беларусі і яе жыхарах. «Я малявала старыя дворыкі ў цэнтры Брэста. Дзеці заглядвалі з цікавасцю ў мальберт, праводзілі, неслі мае сумкі, іх маці мне прыносілі морс. У мяне адчуванне, як быццам я трапіла ў іншы свет. Гасціннасць вашых людзей — проста ў самае сэрца», — дадала Маргарыта Дзмітрыева. 
Адзін з нямецкіх мастакоў прыехаў у Беларусь з гатовай канцэпцыяй стварэння шматслойных карцін. З сабой ён прывёз зямлю з Асвенціма, змяшаў з беларускай зямлёй і зрабіў асаблівыя фарбы. Менавіта імі намаляваў серыю карцін, выказаўшы эмоцыі ад наведвання гістарычных мясцін. Гэта своеасаблівы жэст міру і заклік не дапусціць паўтарэння вайны. 
Кожны ўдзельнік пленэру заўважаў блізкае менавіта яму. За невялікі прамежак часу ім трэба было намаляваць карціны, выказаць пачуцці. «Тое, што глыбока хвалюе чалавека, — усё гэта ўвекавечана ў іх карцінах. Мастакі ўклалі свае эмоцыі ў свае палотны, — расказаў суарганізатар пленэру з нямецкага боку Олівер Шнееман. — Ідэя ў тым, каб арганізавалі выставу ў Германіі як беларускіх, так і нямецкіх мастакоў».
Таксама госці пабывалі сёння на мерапрыемствах з нагоды Дня Незалежнасці ў Брэсцкай крэпасці. «Мне заўсёды вельмі прыемна тут знаходзіцца. Уражаны, з якой гордасцю ў Беларусі святкуюць. Мяне кранае, з якой адкрытасцю і натуральнасцю гэты дзень адзначаецца. Мінск — сталіца, вядома, там мерапрыемствы больш маштабныя. Але ў Брэсце сёння таксама маштабна святкуюць. Я б хацеў, каб людзі ў Германіі таксама маглі ганарыцца сваёй краінай. У нас цяпер, на жаль, з гэтым крыху складана. А эмоцыі вельмі важныя. Няхай гэта гордасць або проста адчуванне камфорту ад жыцця ў краіне, якая святкуе сваю выключнасць», — выказаў меркаванне Олівер Шнееман. 
Фота Віялеты Южаковай
