Электрасамазвал, пастаўка цягавых батарэй. Якія праекты рэалізуюць беларускія кампаніі і «Расатам»
Фота з архіва 22 жніўня, Мінск . Якія праекты рэалізуюць беларускія кампаніі і дзяржкарпарацыя «Расатам», расказаў журналістам намеснік дырэктара краінавага офіса «Расатама» ў Беларусі Антон Юспа ў час аўтапрабегу «БелАЭС — чыстая энергія мірнага атама»,
Антон Юспа падкрэсліў, што будаўніцтва Беларускай атамнай электрастанцыі стала адным з буйнейшых праектаў расійска-беларускага супрацоўніцтва. Сёння ў Беларусі налічваецца больш за 65 тыс. адзінак электратранспарту, а зарадная інфраструктура — адна з найбольш перадавых на прасторы СНД.
Сярод сумесных праектаў намеснік дырэктара адзначыў пастаўку цягавых батарэй, якія вырабляюцца дзяржкарпарацыяй. «Таксама ўзаемадзейнічаем з кампаніяй «БКМ Холдынг» – ужо рэалізаваны праект пастаўкі тралейбусаў з павышаным аўтаномным ходам у Санкт-Пецярбург», – сказаў ён.
Дзяржкарпарацыя прымае ўдзел у праекце МАЗа — распрацоўваецца перонны электробус. Яшчэ адным напрамкам супрацоўніцтва з’яўляецца ўзаемадзеянне з БЕЛАЗам. Бакі працуюць над стварэннем электрычнага кар’ернага самазвала.
У тым ліку ёсць праекты ў сферы электрамабіляў. «Узаемадзейнічаем з Міністэрствам энергетыкі па ўкараненні стацыянарных сістэм накаплення энергіі. Наша мэта — не толькі паставіць абсталяванне, а максімальна паглыбіць лакалізацыю і разам выходзіць на рынкі трэціх краін», — падкрэсліў Антон Юспа.
Мерапрыемства «БелАЭС — чыстая энергія мірнага атама» накіравана на папулярызацыю дасягненняў Беларусі ў сферы атамнай энергетыкі, ролі Беларускай атамнай станцыі ў развіцці экалагічных сегментаў эканомікі, уключаючы электратранспарт. Арганізатарам акцыі выступае Міністэрства энергетыкі пры падтрымцы дзяржкарпарацыі «Расатам», садзейнічанні Мінгарвыканкама і Астравецкага райвыканкама.
Фота Максіма Гучака
