Духоўныя святыні, тэатр і сядзібы. Што Слонімскі раён можа прапанаваць турыстам
Фота з архіва 23 кастрычніка, Слонімскі раён . Багатая духоўная спадчына, рэдкія помнікі архітэктуры і тэатральныя экскурсіі робяць Слонімскі раён адным з найбольш перспектыўных турыстычных напрамкаў Гродзенскай вобласці. Аб гэтым расказала дырэктар Слонімскага раённага турыстычнага інфармацыйнага цэнтра (ТІЦ) Вікторыя Шыманская ў ходзе дыялогавай пляцоўкі «Рэлігійныя аб’екты як пункты прыцяжэння турыстаў і паломнікаў», якая прайшла ў Свята-Успенскім Жыровіцкім мужчынскім манастыры,
Дырэктар цэнтра прэзентавала прадстаўнікам туріндустрыі Слонімскі край як рэгіён з амаль тысячагадовай гісторыяй і перспектыўны турыстычны напрамак.
“Слонім цікавы для турыста перш за ўсё сваёй насычанасцю. На тэрыторыі раёна налічваецца больш за 90 аб’ектаў гісторыка-культурнай спадчыны, працуюць 4 музеі. Для размяшчэння гасцей даступна 9 аб’ектаў агульнай умяшчальнасцю 290 ложка-месцаў, уключаючы гасцініцы, дамы паломнікаў і аграсядзібы, а таксама 27 аб’ектаў грамадскага харчавання. Асобная рыса Слоніма — яго шматканфесійнасць: тут сканцэнтравана найбольшая колькасць дзеючых праваслаўных манастыроў, а таксама ўнікальныя помнікі архітэктуры, такія як касцёл Святога Апостала Андрэя і харальная сінагога 1642 года — адна з найстарэйшых у Беларусі», — расказала Вікторыя Шыманская.
Яна адзначыла, што, безумоўна, галоўным магнітам раёна выступае Свята-Успенскі Жыровіцкі манастыр, аднак рэгіён прапануе і шмат іншага. Напрыклад, прамысловы турызм, сядзібна-паркавы комплекс, звязаны з родам Пуслоўскіх, квесты, а таксама раённы драматычны тэатр, які не мае аналагаў у беларускіх гарадах з насельніцтвам менш за 50 тыс. чалавек, з гісторыяй, што ўзыходзіць да прыдворнага тэатра Міхаіла Казіміра Агінскага.
Кіраўнік ТІЦ таксама прапанавала тураператарам укараняць эксклюзіўныя прадукты. Напрыклад, закулісныя тэатральныя экскурсіі і наведванне этнагасціных, дзе, у прыватнасці, можна даведацца аб традыцыі выпякання знакамітага паўлаўскага каравая.
Прадстаўніца тураператарскага бізнесу Валянціна Бараноўская падкрэсліла асаблівую значнасць знаёмства з духоўнымі святынямі рэгіёна для маладога пакалення і замежных гасцей.
«Наведванне манастыра — гэта тое, што сёння жыццёва неабходна нашай моладзі. У век урбанізацыі і глабалізацыі малады чалавек шукае магчымасць насыціцца сапраўднымі духоўнымі каштоўнасцямі. Акрамя таго, вялізны патэнцыял тоіцца ў рабоце з замежнымі студэнтамі, якія вучацца ў Беларусі. Прыязджаючы сюды з розных куткоў свету, яны праз знаёмства з нашымі святынямі могуць адчуць шчырасць, традыцыю і глыбіню беларускай культуры», — падзялілася меркаваннем Валянціна Бараноўская.
Дыялогавая пляцоўка стала часткай выязнога семінара ў Гродзенскай вобласці «Роля рэлігійнай спадчыны Беларусі ў развіцці турызму», арганізаванага Нацыянальным агенцтвам па турызме. Мерапрыемства сабрала каля 50 прадстаўнікоў айчыннай галіны, каб азнаёміцца з патэнцыялам галоўных святынь рэгіёна — Свята-Успенскага Жыровіцкага мужчынскага і Свята-Амвросіеўскага жаночага манастыроў.
