Два Гран-пры ў Казахстана, першы фэст вулічнага мастацтва. Чым уразіў «Славянскі базар» у 2015-м
4 ліпеня, Віцебск . Да XXXV Міжнароднага фестывалю мастацтваў «Славянскі базар у Віцебску» засталося 12 дзён. БЕЛТА прапануе акунуцца ў рэтраспектыву: штодзень у архіўных матэрыялах расказваем пра самыя яркія моманты кожнага фестывалю па гадах. Сёння — пра фестываль 2015 года.
«Славянскі базар» у 2015 годзе прыняў гасцей у Віцебску 24-ы раз. Асноўныя мерапрыемствы прайшлі з 9 па 13 ліпеня, а дадатковыя — 7, 8, 14 і 15 ліпеня.
Праграма XXIV Міжнароднага фестывалю мастацтваў «Славянскага базару ў Віцебску» ўключала больш за 90 мерапрыемстваў, з іх 18 канцэртаў адбыліся на галоўнай фестывальнай пляцоўцы — у Летнім амфітэатры. Сярод ключавых падзей форуму мастацтваў — традыцыйныя канцэрты ўрачыстага адкрыцця і закрыцця фестывалю, Дзень моладзі, Дзень Саюзнай дзяржавы, конкурсныя дні маладых выканаўцаў і сольныя выступленні артыстаў. Таксама госці фестывалю змаглі наведаць дзясяткі мерапрыемстваў у рамках тэатральнай праграмы, фэсту вулічнага мастацтва. Упершыню ў 2015 годзе быў пабіты рэкорд па колькасці краін-удзельніц — 41. Асноўнымі тэмамі XXIV Міжнароднага фестывалю мастацтваў «Славянскі базар у Віцебску» сталі 70-годдзе Вялікай Перамогі і Год моладзі.
Упершыню за многія гады ўрачыстае адкрыццё адбылося без удзелу кіраўніка дзяржавы, аднак Прэзідэнт Беларусі прыехаў на закрыццё культурнага форуму.
У Канцэртнай зале «Віцебск» прайшла выстава вядучага фотакарэспандэнта БЕЛТА Аляксандра Хітрова з больш як 20 фатаграфіямі розных гадоў, прысвечаная «Славянскаму базару», а на адкрыцці Міжнароднага прэс-цэнтра яму ўручылі ўзнагароду ад дырэкцыі форуму мастацтваў «Залатое пяро» за лепшае асвятленне ў сродках масавай інфармацыі мерапрыемстваў папярэдняга, 23-га фестывалю.
Фестываль усё больш упэўнена з кожным годам асвойваў розныя лакацыі ў горадзе. У 2015 годзе рамесныя, абрадавыя, лялечныя, тэатральныя і іншыя народныя традыцыі прадэманстравалі на «Славянскім базары ў Віцебску» майстры з Беларусі, Расіі, Украіны, Літвы, Латвіі і Славакіі. З 9 па 13 ліпеня на плошчы Свабоды праходзілі іх выступленні і прэзентацыі. У творчай форме свае брэнды на свяце «Рознакаляровая Віцебшчына» прэзентавалі ўсе раёны вобласці. Адбылося рэгіянальнае свята ручніка «Ручнік — як лёс», «Свята дружбы», фестываль «Іграй, гармонік», падвядзенне вынікаў і закрыццё конкурсу па стварэнні лялек і цацак «Забава-2015». Акрамя таго, на свяце «Фестывалі — фестывалю» тры раёны Віцебшчыны прэзентавалі знакавыя мерапрыемствы — «Дняпроўскія галасы ў Дуброўне», «Звіняць цымбалы і гармонік», «Браслаўскія зарніцы».
Упершыню ў рамках «Славянскага базару» прайшоў фэст вулічнага мастацтва «На сямі вятрах», і дэбют яго адбыўся 10 ліпеня. На некалькіх адкрытых пляцоўках Віцебска прайшлі паказы, тэатралізаванае шэсце, выступленні батлеечных калектываў з розных рэгіёнаў. З таго часу гэта свята штогод збірае дзясяткі творчых калектываў на пешаходных вуліцах і плошчах Віцебска.
На XXIV Міжнародным фестывалі мастацтваў «Славянскі базар у Віцебску» 10 ліпеня гледачы ўпершыню пачулі песню-гімн Саюзнай дзяржавы «Анёл над горадам Шагала» ў час канцэрта «Саюзная дзяржава запрашае… Злучаючы прастору і час».
Маладзёжны падворак, фестываль гумару, конкурс барменаў «Мабільная кавярня» і 3D-малюнкаў сталі навінкамі Дня моладзі на «Славянскім базары» ў 2015 годзе. Уздоўж алеі на вуліцы Багдана Хмяльніцкага разгарнулася маштабная разнапланавая інтэрактыўная экспазіцыя «Маладзёжны падворак». Сюды з’ехаліся шматлікія госці і прывезлі лепшыя песні, таленты, тавары, промыслы. Кожная абласная і Мінская арганізацыі БРСМ на сваёй пляцоўцы не проста арганізавалі выставу страў нацыянальнай кухні, а яшчэ і правялі майстар-класы па іх прыгатаванні, запрасілі жадаючых на дэгустацыю. Адначасова з гэтай інтэрактыўнай экспазіцыяй працавала маладзёжная эстафета «Калейдаскоп гумару» — былі арганізаваны выступленні творчых калектываў, груп, выканаўцаў, каманд КВЗ, аб’яднаных тэмай гумару. Завяршальным мерапрыемствам Дня моладзі на «Славянскім базары ў Віцебску» стала бітва дыджэяў.
Сенсацыяй музычных конкурсаў сталі прадстаўнікі Казахстана, якія ў 2015 годзе заваявалі галоўныя прызы XIII Міжнароднага дзіцячага музычнага конкурсу «Віцебск» і XXIV Міжнароднага конкурсу выканаўцаў эстраднай песні «Віцебск». Гэта юная зорачка Луіза Нуркуатава (яна спаборнічала за перамогу ў ліку 20 вакалістаў з 17 краін) і стаўшы ў далейшым добрым сябрам віцебскага фестывалю Дзімаш Кудайберген (яму канкурэнцыю ў фінале конкурсу склалі 14 удзельнікаў).
Дарэчы, зорнае журы конкурсу эстрадных выканаўцаў узначаліў народны артыст Азербайджанскай ССР, заслужаны дзеяч мастацтваў Рэспублікі Дагестан, доктар мастацтвазнаўства, прафесар Палад Бюльбюль аглы, якому на закрыцці фестывалю Прэзідэнт Беларусі ўручыў спецыяльныную ўзнагароду «Праз мастацтва — да міру і ўзаемаразумення». «Ад імя ўсіх удзельнікаў дазвольце выказаць вам як кіраўніку гэтай цудоўнай краіны вялікую падзяку за выдатнае свята музыкі, свята мастацтваў, якое прайшло ў Віцебску. Шчыра, ад усёй душы падзякаваць за высокую прэмію з выдатнай назвай. Я расцэньваю гэту прэмію не як свой асабісты ўклад, а як вашу ўвагу да развіцця дружалюбных адносін паміж Беларуссю і Азербайджанам», — сказаў праслаўлены артыст.
Таксама на закрыцці фестывалю, звяртаючыся да прызёраў музычных конкурсаў, Аляксандр Лукашэнка падкрэсліў: «Дарагія лаўрэаты, няхай поспех на такім прэстыжным першынстве стане для кожнага з вас важнай прыступкай да шырокага прызнання. Я спадзяюся, аднойчы і вашы імёны ўпрыгожаць цудоўную Плошчу зорак. Дарэчы, месца для вас там шмат, і гэтыя месцы ўжо для вас зарэзерваваны. Перамога ў такім няпростым спаборніцтве — гэта сур’ёзная заяўка на будучае. Ва ўмовах конкурснай барацьбы чалавек праяўляе не толькі яркасць свайго таленту, але і моц свайго характару, — сказаў кіраўнік дзяржавы. — «Славянскі базар у Віцебску» называюць летняй культурнай Алімпіядай. Ён ужо зарэкамендаваў сябе як месца, дзе музыканты, мастакі, артысты і знатакі мастацтва знаёмяцца з новымі тэндэнцыямі і творчымі знаходкамі з усіх канцоў зямнога шара. Тут людзі разумеюць, як многае збліжае ўсіх нас і як патрэбны нам мір. Віцебскі фестываль мастацтваў набывае асаблівае значэнне ў справе ўмацавання міру і ўзаемаразумення паміж краінамі і народамі».
Па сталай традыцыі пасля закрыцця фестывалю галоўную канцэртную пляцоўку — Летні амфітэатр — занялі выканаўцы шансона, якія 14 ліпеня сабралі поўную залу гледачоў. Апошняй падзеяй фестывальных «Тэатральных сустрэч» у гэты ж дзень стаў паказ Маскоўскага тэатра «Ля Нікіцкіх варот», дзе расійскія артысты паказалі спектакль «Песні нашай камуналкі» на сцэне Канцэртнай залы «Віцебск». Завяршыла праграму фестывалю 15 ліпеня «Рок-панарама» ў Летнім амфітэатры.
Асноўныя мерапрыемствы XXXV Міжнароднага фестывалю мастацтваў «Славянскі базар у Віцебску» пройдуць з 16 па 19 ліпеня, а першыя канцэрты адбудуцца ўжо 14 ліпеня.
