Дадатковую гарантыю для працуючых бацькоў дзяцей з інваліднасцю разглядаюць у Беларусі
Фота з архіва 12 лістапада, Мінск . Дадатковую гарантыю для працуючых бацькоў дзяцей з інваліднасцю разглядаюць у Беларусі. Адпаведнае права можа з’явіцца па аналогіі з дзеючым заканадаўствам Расіі, паведаміла журналістам старшыня Пастаяннай камісіі па працы і сацыяльных пытаннях Палаты прадстаўнікоў Ірына Касцевіч перад пасяджэннем Камісіі Парламенцкага сходу Саюза Беларусі і Расіі па працы і сацыяльнай палітыцы ў рэжыме відэа-канферэнц-сувязі,
Ірына Касцевіч адзначыла, што і ў Расіі, і ў Беларусі ёсць норма, якая дае права працуючым сем’ям, што выхоўваюць дзяцей-інвалідаў, браць адзін аплатны свабодны ад работы дзень на тыдзень. У Беларусі ёсць альтэрнатыўны варыянт: скарочаны на гадзіну рабочы дзень, што таксама запатрабавана ў плане гібкага графіка і вырашэння сямейна-бытавых пытанняў.
Маючы такую базавую норму, кожная краіна затым пайшла сваім шляхам развіцця, адзначыла старшыня Пастаяннай камісіі.
Так, у Расіі дзейнічае норма, згодна з якой адзін з працуючых бацькоў дзіцяці з інваліднасцю, які не выкарыстаў дадатковыя выхадныя штомесяц, можа іх падсумаваць і атрымаць дадатковы водпуск да 24 дзён, каб вырашаць пытанні па аздараўленні свайго дзіця-інваліда, санаторна-курортнага лячэння, рэабілітацыі.
«Убачыўшы новую практыку Расійскай Федэрацыі, сёння Беларусь таксама рухаецца па гэтай норме. Урад падрыхтаваў праект змяненняў у Працоўны кодэкс. Цяпер гэта на пляцоўцы ўрада. Але ў камісіі будзем абмяркоўваць, з якімі праблемамі сутыкнулася РФ, паколькі практыка рэалізацыі там больш як тры гады, каб максімальна ўлічыць усе пытанні і прадугледзець гэту норму ў заканадаўстве Беларусі», — сказала Ірына Касцевіч.
Яна падкрэсліла: людзі з інваліднасцю маюць патрэбу ў роўных правах у Саюзнай дзяржаве.
Гаворачы аб супрацоўніцтве па пытаннях людзей з інваліднасцю, дэпутат звярнула ўвагу на наяўнасць цікавых прапаноў па пашырэнні тых або іншых напрамкаў. У прыватнасці, прадпрыемства Беларусі заключыла мемарандум аб намерах з аналагічным прадпрыемствам у Калінінградскай вобласці па вытворчасці сучасных сродкаў тэхнічнай рэабілітацыі, перш за ўсё інвалідных калясак.
Ірына Касцевіч падкрэсліла, што кожная краіна мае свой вопыт і ўзровень вытворчасці, таму супрацоўніцтва прадпрыемстваў будзе ўзаемакарысна.
Акрамя таго, ёсць намер аб падпісанні пагаднення рэгіянальнага ўзроўню — Гомельскага рэгіёна з Калінінградскай вобласцю. Паводле слоў парламентарыя, тэма супрацоўніцтва намнога шырэйшая. Гэта не толькі пытанні захавання правоў людзей з інваліднасцю, але і даўгалецце, пытанні сацыяльна-працоўных адносін і іншае.
Пасяджэнне Камісіі Парламенцкага сходу Саюза Беларусі і Расіі па працы і сацыяльнай палітыцы стала прадаўжэннем вялікага дыялогу, які разгарнуўся ў кастрычніку гэтага года на пляцоўцы Калінінградскай вобласці ў рамках семінара па рэалізацыі правоў інвалідаў, дзе абмяркоўваліся дасягненні і шляхі вырашэння існуючых праблем.
Семінар атрымаўся маштабным. Прагучала каля 30 дакладаў па розных напрамках, адзначыла старшыня Пастаяннай камісіі. «Але ключавое — гаварылі аб асноўных нормах Канвенцыі аб правах інвалідаў, якую ратыфікавалі Расія і Беларусь», — сказала яна.
Парламентарый адзначыла, што семінар даў магчымасць зверыць гадзіннікі, прааналізаваць адпаведнасць міжнародным стандартам у рамках права на жыццё людзей з інваліднасцю, права на адукацыю, права на працу, на занятасць, на ахову здароўя і таксама на ўдзел у палітычным і культурным жыцці краіны ў межах Саюзнай дзяржавы.
