«Да гэтага ёсць усе перадумовы». Кушнарэнка аб мэце сабраць у вобласці 3 млн тон збожжа ў 2026 годзе
Фота з архіва 17 чэрвеня, Мінск . Мінская вобласць імкнецца сабраць у гэтым годзе 3 млн тон збожжа. Аб гэтым журналістам заявіў старшыня Мінскага аблвыканкама Аляксей Кушнарэнка па выніках даклада кіраўніку дзяржавы,
Галоўнай тэмай даклада Прэзідэнту стала сітуацыя ў аграпрамысловым комплексе Мінскай вобласці, размова ішла і аб сітуацыі на палях. «Тыя перадумовы, якія ёсць на сённяшні дзень, нас радуюць. Перш за ўсё — захаванасць ураджаю, азімых культур. Мы практычна не страцілі зімавы рапс (узровень страт — менш як 2 працэнты) і іншых азімых збожжавых культур (страты таксама менш як 2 працэнты). Акрамя таго, мы своечасова правялі ўсю тэхналагічную паслядоўнасць яравой сяўбы. Таксама вельмі спадзяёмся на ўмовы надвор’я, якія будуць спрыяць таму, каб мы сабралі дастойны ўраджай», — сказаў Аляксей Кушнарэнка. 
Ён таксама звярнуў увагу на тое, што будзе лічыцца дастойным ураджаем. «Кіраўнік дзяржавы паставіў планку, ніжэй за якую мы не можам апускацца. У мінулым годзе сабралі разам з рапсам і кукурузай 2,7 млн т збожжа. Гэта і ёсць той мінімум, які мы павінны сабраць. Але перад сабой ставім мэту (і неаднаразова кіраўнік дзяржавы даваў нам гэта зразумець як задачу на перспектыву) — выйсці на 3 млн т збожжа. Да гэтага паказчыка мы і будзем імкнуцца. У прынцыпе, для гэтага ёсць усе перадумовы», — падкрэсліў старшыня Мінаблвыканкама.
