Больш за 3 млрд метраў тканіны. На Аршанскім ільнокамбінаце расказалі аб гісторыі і будучыні прадпрыемства
28 кастрычніка, Орша /Алеся Пушнякова . Больш за 3 млрд метраў ільняной тканіны выпушчана на Аршанскім ільнокамбінаце за час існавання прадпрыемства, якое двойчы было ўдастоена Дзяржаўнага знака якасці. Аб гэтым прадстаўнікам СМІ ў час прэс-туру па Віцебскай вобласці расказалі ў час экскурсіі па льнокамбінаце,
Нацыянальны прэс-цэнтр Беларусі сумесна з Дзяржкамітэтам па стандартызацыі і Віцебскім аблвыканкамам для знаёмства журналістаў з вядучымі прадпрыемствамі паўночнага рэгіёна арганізавалі прэс-тур. Прадстаўнікі розных СМІ наведалі Аршанскі льнокамбінат, які з’яўляецца флагманам айчыннай лёгкай прамысловасці. Прадпрыемства ў 2025 годзе і 2026 годзе было ўдастоена Дзяржаўнага знака якасці — за камплект пасцельнай бялізны «Васільковы» і паўільняны плед «Альба». Намеснік генеральнага дырэктара Сяргей Сідзін расказаў гасцям, як за апошнія 10 гадоў ішла мадэрнізацыя вытворчасці.
«Для нашага прадпрыемства знак якасці даўно стаў прывычным, яшчэ ў савецкія часы, да 1980-х гадоў, 80% усёй нашай прадукцыі выпускалася з Дзяржаўным знакам якасці СССР. А дзве нашы знакамітыя ткачыхі, Любоў Улаховіч і Вольга Федуковіч, працавалі з персанальным знакам якасці — іх прадукцыя не бракавалася, яна выходзіла адразу з імянным знакам якасці. Таму тое, што Аршанскі льнокамбінат стаў адным з лідараў адроджанага конкурсу на прысваенне Дзяржзнака якасці, — гэта глыбока гістарычны факт, пацверджаны вялікай карпатлівай працай, якую правялі нашы спецыялісты для таго, каб гэта прадукцыя была значнай і, самае галоўнае, любімай і папулярнай у нашых спажыўцоў,» — адзначыў Сяргей Сідзін.
Ён падкрэсліў, што 88% выпускаемай прадукцыі ідзе на экспарт у 40 краін свету, і таму якасці ўдзяляецца асаблівая ўвага. «Нашы асноўныя спажыўцы — гэта еўрапейцы, а яны разбалаваны якасцю, асартыментам. І калі мы прыходзім да іх, мы не можам дыктаваць умовы, мы можам толькі адпавядаць высокім стандартам», — сказаў Сяргей Сідзін.
Аршанскі льнокамбінат у мінулым годзе адзначыў 95-годдзе. Цяпер прадпрыемства з’яўляецца адзіным у Беларусі, дзе адбываецца поўны цыкл перапрацоўкі лёну. «Мы — адзіная ў свеце кампанія, якая можа перапрацаваць любы лён, які расце на нашых палях, — ад самых нізкіх да самых высокіх нумароў. Ёсць у нас тэхналогія, якая дае магчымасць атрымліваць беларускі батыст — гэта тонкая тканіна, адрэзак якой памерам метр на метр свабодна праходзіць у заручальны пярсцёнак. На нашым прадпрыемстве працуюць 3580 чалавек, якія ў год выпускаюць 18,5 млн пагонных метраў тканіны, больш за 7 млн штучных вырабаў і больш за 6,5 тыс. т катананізаванага валакна. Прадпрыемства размешчана на адной вытворчай пляцоўцы 47 га. Тут размешчаны пяць фабрык, кожная з якіх спецыялізуецца на канкрэтным выпуску прадукцыі. За ўвесь час існавання наш ільнокамбінат саткаў амаль 3 млрд пагонных метраў тканіны. Калі скласці іх разам, то можна абкруціць экватар Зямлі 99 разоў», — растлумачыў намеснік гендырэктара.
Напярэдадні Дня Кастрычніцкай рэвалюцыі на льнокамбінаце плануюць адкрыць новую кольцапрадзільную вытворчасць — фабрыку з высокатэхналагічным абсталяваннем. Тут будуць выпускаць у тым ліку імпартазамяшчальную прадукцыю. У будаўніцтва аб’екта ўкладзена каля $20 млн. «Аршанскі льнокамбінат за апошнія 10 гадоў уклаў у мадэрнізацыю амаль $200 млн інвестыцый. Гэта дало магчымасць стварыць высокаэфектыўную і сучасную вытворчасць, у якой сканцэнтраваны як нашы традыцыі перапрацоўкі лёну, так і новыя тэхналогіі, якія адпавядаюць патрэбнасцям сучаснай вытворчасці», — падкрэсліў Сяргей Сідзін.
На прадпрыемстве могуць не проста вырабляць ільняную тканіну, а рабіць яе мякчэйшай, больш прыемнай навобмацак. Журналістам паказалі вытворчыя цэхі, лініі, ткацкія станкі і расказалі, колькі працы ўкладваецца ў кожны метр ільняной тканіны. 
Фота Аляксандра Хітрова
