Беларусь і Бразілія нацэлены больш цесна супрацоўнічаць у сферы сельскай гаспадаркі
Фота з архіва 23 ліпеня, Брэст . Беларусь і Бразілія нацэлены больш цесна супрацоўнічаць у сферы сельскай гаспадаркі. Аб гэтым паведаміў Надзвычайны і Паўнамоцны Пасол Беларусі ў Бразіліі Андрэй Андрэеў.
Дыпламат і старшыня Брэсцкага аблвыканкама Пётр Пархомчык абмеркавалі на сустрэчы ключавыя напрамкі супрацоўніцтва з рэгіёнамі Бразіліі. «У адпаведнасці з даручэннямі кіраўніка дзяржавы вядзецца работа па нарошчванні дынамікі ўсяго спектра двухбаковых адносін Беларусі і Бразіліі. У пачатку восені мы плануем палітычныя кансультацыі. У якасці наступнага кроку прапрацоўваецца правядзенне пасяджэння камісіі па гандлёва-эканамічных пытаннях. Прыярытэт — канкрэтныя вынікі на зямлі», — падкрэсліў Андрэй Андрэеў.
Пасол адзначыў, што асноўная ўвага ўдзяляецца гандлёва-эканамічнаму супрацоўніцтву ў сферы сельскай гаспадаркі і машынабудавання. Так, Беларусь нарошчвае пастаўкі ўгнаенняў у лацінаамерыканскую краіну. У структуры экспарту прысутнічаюць і іншыя таварныя пазіцыі, якія задавальняюць патрэбнасці бразільскага агракомплексу.
«Для абедзвюх краін вельмі важна развіццё прамысловай кааперацыі і навукова-практычнага ўзаемадзеяння ў сферы сельскай гаспадаркі. З улікам высокай удзельнай вагі агракампанента ў нацыянальных эканоміках, наяўнасці адпаведных кампетэнцый і тэхналогій узаемадапаўняльнае і ўзаемавыгаднае супрацоўніцтва мае добрыя перспектывы. Адпаведныя прадметныя крокі па яго рэалізацыі абмяркоўваліся з кіраўніцтвам Брэсцкай вобласці з улікам прамысловага, агратэхнічнага і сельскагаспадарчага патэнцыялу рэгіёна. Так, на палі Брэстчыны дастаўлены доследны ўзор бразільскай спецыялізаванай сельгастэхнікі. У ходзе выпрабаванняў ён зарэкамендаваў сябе станоўча, адпавядае нашым задачам па павышэнні эфектыўнасці глебаапрцоўкі. Нацэлены на прапрацоўку закупак і ўзаемавыгаднай вытворчай кааперацыі», — растлумачыў дыпламат.
Не застаюцца ўбаку пытанні грамадска-палітычнага і гуманітарнага супрацоўніцтва. «Праведзены шэраг сустрэч па лініі міністэрстваў аховы здароўя з удзелам Мінскага навукова-практычнага цэнтра хірургіі, транспланталогіі і гематалогіі. Вядзецца дыялог паміж установамі вышэйшай адукацыі. Нельга не адзначыць актывізацыю дыялогу па лініі палітычных і грамадскіх аб’яднанняў, уключаючы Беларускую партыю «Белая Русь», — пералічыў Андрэй Андрэеў.
Паводле яго слоў, адносіны Беларусі і Бразіліі становяцца больш трывалымі і плёнными. «Двухбаковы дыялог ужо не абмяжоўваецца выключна гандлем. Ён прадаўжае трансфармавацца ў партнёрства, змацаванае агульным разуменнем справядлівага светаўладкавання і ўзаемадапаўняльным характарам нашых эканомік. Бразілія — наш сябар і аднадумец у Лацінскай Амерыцы. Са свайго боку, Беларусь была і застаецца стабільным і надзейным партнёрам Бразіліі», — рэзюмаваў дыпламат.
