Амаль 400 новых кампаній з Расіі акрэдытаваліся на БУТБ у 2026 годзе
Фота з архіва 17 верасня, Мінск . Беларуская ўніверсальная таварная біржа акрэдытавала з пачатку года для ўдзелу ў біржавых таргах 387 кампаній з 64 рэгіёнаў Расіі, паведамілі ў прэс-службе БУТБ.
Большасць з іх — прадстаўнікі бізнесу з Маскоўскай, Ленінградскай, Смаленскай, Бранскай і Свярдлоўскай абласцей. Агульная ж колькасць расійскіх карыстальнікаў беларускай біржавой пляцоўкі перасягнула 5300, што складае больш за палову замежных кліентаў БУТБ. Аб гэтым паведаміў начальнік упраўлення знешнеэканамічнай дзейнасці біржы Яраслаў Кавальчук, выступаючы на секцыі «Экспарт прадукцыі АПК на рынкі прыярытэтных краін», якая ўваходзіць у дзелавую праграму 41-й спецыялізаванай выстаўкі-форуму «Менавы двор», якая праходзіць 16-18 верасня ў Арэнбургу.
«Цікавасць расійскага бізнесу да біржавога рынку Беларусі праяўляецца не толькі ў пастаянным пашырэнні кола ўдзельнікаў, але і ў росце аб’ёмаў здзелак. Па выніках студзеня-жніўня гэты паказчык павялічыўся на 22%, наблізіўшыся да $1 млрд у эквіваленце. Пры гэтым звыш 80% біржавога тавараабароту расійскіх кампаній прыпала на прадукцыю сельскай гаспадаркі. У асноўным гэта былі закупкі беларускага сметанковага масла, сухога малака, мясапрадуктаў і льнянога валакна», — расказаў Яраслаў Кавальчук.
Гаворачы аб супрацоўніцтве Беларусі і Арэнбургскай вобласці ў сферы біржавога гандлю, прадстаўнік БУТБ адзначыў высокую дадатную дынаміку тавараабароту і актыўны прыток новых удзельнікаў з гэтага рэгіёна. «У параўнанні са студзенем-жніўнем мінулага года арэнбургскія кампаніі ў 12 разоў нарасцілі суму біржавых здзелак на нашай платформе. Ключавую ролю ў гэтым адыграў выхад на таргі буйнога вытворцы ліставога пракату з Арэнбургскай вобласці, які скарыстаўся біржавым механізмам для рэалізацыі сваёй прадукцыі ў Беларусі. Лічу гэта наглядным прыкладам практычнай карысці біржы як інструмента развіцця і ўмацавання гандлёва-эканамічных адносін з рэгіёнамі Расіі», — падкрэсліў начальнік упраўлення ЗЭД БУТБ.
Па стане на 16 верасня 2026 года на БУТБ былі акрэдытаваны 18 суб’ектаў гаспадарання Арэнбургскай вобласці. У Беларусь праз біржу пастаўляліся вырабы з чорных металаў, а ў Арэнбургскую вобласць — піламатэрыялы хвойных парод.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных біржаў ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
