Прэзідэнт даў шэраг даручэнняў для замацавання новых дамоўленасцей з Расіяй — Турчын
Фота з архіва 2 верасня, Мінск . Прэзідэнт Беларусі Аляксандр Лукашэнка даў шэраг даручэнняў для замацавання новых дамоўленасцей з Расіяй. Аб гэтым паведаміў журналістам прэм’ер-міністр Аляксандр Турчын па выніках даклада кіраўніку дзяржавы,
Як адзначыў прэм’ер-міністр, мінулы тыдзень прайшоў пад знакам беларуска-расійскага парадку дня. Аляксандр Лукашэнка сустрэўся з Прэзідэнтам Расіі Уладзімірам Пуціным, старшынёй урада Расіі Міхаілам Мішусціным, першым намеснікам старшыні ўрада Расіі Дзянісам Мантуравым. Аляксандр Турчын у сваю чаргу правёў перагаворы ў Санкт-Пецярбургу са старшынёй праўлення ПАТ «Газпрам» Аляксеем Мілерам, а ў Мінску — з Дзянісам Мантуравым.
«Фактычна кіраўнікі дзяржаў зацвердзілі тыя дамоўленасці, якія былі дасягнуты ўрадамі Беларусі і Расіі. Парадак дня быў вельмі шырокі — гэта і супрацоўніцтва ў энергетычнай сферы, пытанні прамысловай кааперацыі, рэалізацыя сумесных інтэграцыйных праектаў, пытанні супрацоўніцтва ў сферы сельскай гаспадаркі. Прэзідэнтам быў дадзены шэраг канкрэтных даручэнняў для фіналізацыі дамоўленасцей, іх замацавання, а таксама па далейшым нашым узаемадзеянні», — сказаў прэм’ер-міністр.
У Мінску 1 кастрычніка адбудзецца пасяджэнне Савета Міністраў Саюзнай дзяржавы, на парадку дня будзе шырокі пералік пытанняў двухбаковага супрацоўніцтва. «Гэта штодзённая работа, якая ідзе пастаянна, узнікаюць новыя пытанні, мы іх вырашаем», — адзначыў Аляксандр Турчын.
«У цэлым я ахарактарызаваў бы бягучы стан беларуска-расійскіх адносін вельмі пазітыўна. Нам фактычна па ўсіх пытаннях удалося дамовіцца. Думаю, што на сярэднетэрміновую перспектыву гэтыя дамоўленасці будуць замацаваны і мы будзем іх паспяхова рэалізоўваць», — рэзюмаваў кіраўнік беларускага ўрада.
