Адобрана задума сумеснага вучэння Беларусі і Расіі «Шчыт Саюза-2027»
Фота «Ваяр» 22 кастрычніка, Мінск . У Мінску на пасяджэнні сумеснай калегіі міністэрстваў абароны Беларусі і Расіі адобрана задума сумеснага аператыўнага вучэння «Шчыт Саюза — 2027». Аб гэтым БЕЛТА паведамілі ў Мінабароны.
Кіраўнікі абаронных ведамстваў падпісалі падагульняючыя дакументы. Міністр абароны Беларусі генерал-лейтэнант Віктар Хрэнін заявіў, што галоўным мерапрыемствам падрыхтоўкі ўзброеных сіл Беларусі і Расіі ў будучым годзе стане правядзенне сумеснага аператыўнага вучэння «Шчыт Саюза — 2027». «Важным напрамкам узаемадзеяння застаецца аператыўная і баявая падрыхтоўка ўзброеных сіл Беларусі і Расіі. Галоўным мерапрыемствам у наступным годзе стане сумеснае аператыўнае вучэнне «Шчыт Саюза — 2027″, якое прызначана прадэманстраваць рашучасць і здольнасць сумесна адстойваць суверэнітэт і тэрытарыяльную цэласнасць нашых дзяржаў, забяспечыць далейшае ўдасканаленне сістэмы ваеннай бяспекі Саюзнай дзяржавы», — сказаў ён і падкрэсліў, што вучэнне будзе мець выключна абарончы характар.
Віктар Хрэнін таксама адзначыў, што калегія зверыла гадзіннікі па шэрагу актуальных пытанняў: процідзеянне спробам фальсіфікацыі гісторыі Вялікай Айчыннай вайны, ваенна-тэхнічнае супрацоўніцтва, правядзенне сумесных мерапрыемстваў аператыўнай і баявой падрыхтоўкі.
«Вынікі сённяшняга пасяджэння чарговы раз пацвердзілі адзінства падыходаў ваенных ведамстваў Беларусі і Расіі да ўзаемадзеяння ў абароннай сферы і нашу нацэленасць на вырашэнне практычных задач па забеспячэнні ваеннай бяспекі Саюзнай дзяржавы», — рэзюмаваў Віктар Хрэнін.
Андрэй Белавусаў канстатаваў, што ў час чарговага пасяджэння прыняты важныя рашэнні па забеспячэнні ваеннай бяспекі Саюзнай дзяржавы. «Асаблівая ўвага ўдзелена пытанням функцыянавання рэгіянальнай групоўкі войскаў (сіл) Рэспублікі Беларусь і Расійскай Федэрацыі, адзінай сістэмы проціпаветранай абароны. Пры гэтым сумесная аператыўная і баявая падрыхтоўка войскаў застаецца прыярытэтным напрамкам нашага ўзаемадзеяння. Прадоўжым актыўна ўкараняць у вучэбны працэс вопыт, атрыманы ў ходзе спецыяльнай ваеннай аперацыі, адпрацоўваць новыя спосабы і тактычныя прыёмы вядзення баявых дзеянняў. Прынятыя сёння рашэнні пасадзейнічаюць умацаванню супрацоўніцтва ваенных ведамстваў Расіі і Беларусі», — удакладніў Андрэй Белавусаў.
