Ад петуніі да рэдкіх мнагалетніх раслін. Гэты беларус вырасціў у сябе на ўчастку больш за паўсотню відаў кветак
Аляксандр Кеўра Навіны сюжэта «Праект «Беларусы ў кадры» на YouTube-канале БЕЛТА» «Не ўсе гатовы плаціць за такое мастацтва». Гэты беларус стварае ўнікальныя карціны з разбітага шкла «Кожны выпадак успрымаеш як уласны». Гэта беларуска 12 гадоў дапамагае людзям з асаблівасцямі Тым, як песцяць кветачкі на прысядзібных участках жанчыны, нікога не здзівіш. А вось каб мужчыну ўдалося асвоіць усе прамудрасці справы і нават стварыць цяплічную гаспадарку — гэта вялікая рэдкасць. Аляксандр Кеўра з вёскі Насілава Маладзечанскага раёна адзін з іх. Кожны год ён высаджвае ўсё новыя і новыя расліны. Пабывалі ў яго ў гасцях і даведаліся шмат цікавага пра вырошчванне ў цяплічных умовах як раскошных садовых, так і простых хатніх кветак.
Любоў да прыгожага — у генах
— Любоў да кветак у мяне з дзяцінства, — прызнаецца Аляксандр Кеўра. Яшчэ хлопчыкам яго адпраўлялі на ўсе летнія канікулы — літаральна з мая па жнівень — у вёску ў Іўеўскі раён. Гаспадарка ў бабулі Ядвігі ў Суботніках была немалая: тры каровы, пяць свіней, немаленькі агарод і… велізарны кветнік! Дзень і ночь працуючы на хатняй гаспадарцы і на падворку, бабуля Сашы знаходзіла сілы і час на прыгожае: ружы, півоні, рамонкі… Яе любоў да кветак перадалася і ўнуку.
Калі стаў дарослым, ён знайшоў блізкую душу і падтрымку ў сваім захапленні ў асобе цудоўнай дзяўчыны, сваёй будучай жонкі. Аляксандр і Юлія жылі ў Маладзечне — іх дамы знаходзіліся недалёка адзін ад аднаго. Але пазнаёміліся яны, калі аднойчы селі ў адно таксі. Тая самая паездка стала для абодвух лёсавызначальнай. У 2000 годзе Юлія і Аляксандр пажаніліся.
Шлях да кветаводства ў мужа і жонкі быў доўгім і няпростым. Да таго часу наш герой паспеў скончыць будаўнічае вучылішча і працаваў электрамантажнікам. Юлія спачатку адвучылася на прадаўца, а затым атрымала дыплом аб вышэйшай эканамічнай адукацыі.
У Маладзечне сям’я Кеўра пражыла 16 гадоў. Тут у іх нарадзіліся тры сыны: Алег і Вадзім — ім цяпер па 22 гады, а таксама Максім, якому 16 гадоў. 
Першы крок — домік у вёсцы
— Так і жылі б у горадзе і дагэтуль, але, калі 12 гадоў таму нам далі зямельны надзел 17 сотак у вёсцы Насілава (прыгарад Маладзечна), я адразу стаў марыць аб сельскім жыцці. Магчымасць дыхаць свежым паветрам і сёння ў мяне выклікае велізарную радасць — амаль эйфарыю! — шчыра прызнаецца Аляксандр Генадзьевіч. 
Атрымаўшы зямлю, муж і жонка адразу задумаліся аб доміку. Галава сям’і як будаўнік знайшоў цудоўны праект жылля ў інтэрнэце, паказаў жонцы і сынам. Усе яго адобрылі. Аляксандр Кеўра заказаў на фірме зруб пад дах — якраз такі, аб якім марылі муж і жонка. І ўсё ж ільвіную долю работ па будоўлі давялося яму рабіць самому. На самыя цяжкія аперацыі зваў «на талаку» сяброў. Дапамагаць ішлі з задавальненнем.
— Каб менш касіць траву, вырашыў паставіць невялікую цяпліцу і высадзіць там кветкі. Жонка, як і некалі мая бабуля, іх заўсёды вельмі любіла, — успамінае аб першым кроку да сваёй мары наш герой.
У хуткім часе ён устанавіў цяпліцу пабольш і сучасную, а недалёка — яшчэ адну. І стаў там вырошчваць… яшчэ больш кветак.
— Люблю кветкі за прыгажосць. Па гэтай жа прычыне яны падабаюцца ўсім жанчынам. І, што самае галоўнае, іх любіць мая жонка Юлія. Вось і выкладваюся максімальна! — прызнаецца Аляксандр Кеўра.
— У цёплую пару займаліся кветкамі, а ў міжсезонне і летам па выхадных працаваў з раніцы і да вечара на будоўлі. Атрымалася, што на ўзвядзенне ўласнага дома ў выніку пайшло пяць гадоў! — прызнаецца субяседнік. — Сёння я атрымліваю велізарнае задавальненне ад таго, што жыву не ў шматпавярховым, а ў сваім доме.
Калі дом быў пабудаваны, муж і жонка, можна сказаць, з галавой акунуліся ў кветкавую тэму. І сябры-знаёмыя іх падтрымалі.
Попыт высокі
Герой нашага праекта прызнаецца, што першапачаткова давялося сутыкнуцца з шэрагам цяжкасцей.
— Неяк пасадзілі расліны ў халодны грунт, і яны загінулі. Мы вельмі перажывалі з-за загінулых кветак і панесеных страт… Цяпер ужо добра ведаем, што зямля павінна прагрэцца… А яшчэ нам давялося засвоіць урок, што ўсе расліны трэба апрацоўваць ад шкоднікаў — кожныя 7-10 дзён. Цяпер так і робім, — дзеліцца вопытам Аляксандр.
Кветкавы асартымент сям’і Кеўра складае каля 40-50 разнавіднасцей. Гэта вербена, гваздзік, сурфінія, бягонія, пеларгонія, петунія…
Вырошчванне кветак справа няпростая, патрабуе шмат часу і сіл. Сыны з дзяцінства дапамагалі бацьку ў цяплічнай гаспадарцы, падрыхтоўцы раслін да продажу. Сёння Алег жыве ў Маладзечне, Вадзім — у Насілаве. Але калі хлопцы не на рабоце, яны заўсёды гатовы ўдзельнічаць ва ўсіх справах і клопатах, якімі жывуць іх бацькі. І ўсё ж галоўным памочнікам Аляксандра Генадзьевіча па цяпліцы застаецца малодшы сынок Максім.
Пры гэтым Юлія Васільеўна — галоўны прадавец кветкавай прадукцыі, якую муж і жонка рэалізуюць на ўніверсальным рынку ў Маладзечне, дастаўляючы яе туды на ўласным мікрааўтобусе. 
— Калі гандляры на рынку ўжо да дзвюх гадзін дня пачынаюць згортвацца, то жонка працуе там яшчэ гадзіну-дзве, да апошняга пакупніка, — гаворыць Аляксандр Кеўра, расстаўляючы прыярытэты і падкрэсліваючы запатрабаванасць навыкаў атрыманай Юліяй Васільеўнай у юнацтве прафесіі прадаўца.
Не маглі не спытаць аб тым, як ідзе гандаль у гэтыя майскія дні і якую самую незвычайную кветкавую расліну маглі купіць у іх знатакі прыгажосці.
— За апошнія суботу-нядзелю прадалі пад тысячу кветак і розных дэкаратыўных раслін. У ліку самых «красунь» — пеларгонія сорту Разалінда, якая адрозніваецца ад іншых вялікімі гронкамі бутонаў у выглядзе ружачак, — дзеліцца Аляксандр Генадзьевіч, які, займаючыся для душы жывымі кветкамі, стаў гандляваць і штучнымі, аформіўшы гэты від дзейнасці як індывідуальны прадпрымальнік.
Попыт мужа і жонкі вывучаюць праз інтэрнэт, а таксама ў час продажаў кветак на рынку. 
— Часта пакупнікі называюць тыя віды і сарты, якімі яны хацелі б упрыгожыць свае дамы і клумбы, але на момант іх візіту такіх раслін у нас не было. Стараемся вырошчваць менавіта тое, аб чым яны мараць, — адзначае наш герой.
Ад элітнага газона да вертыкальнага азелянення
Каб даведацца аб тым, як муж і жонка вырошчваюць кветкі, ідзём у цяпліцы. Адна з іх — са штучным палівам, ацяпляецца — у халады кацёл загружаецца пелетамі. У планах — абсталяванне ацяпленнем другой цяпліцы, а таксама ўстаноўка яшчэ адной — трэцяй.
Па тым, з якім гонарам гаспадар прадстаўляе па чарзе расліны ў яго царстве кветак, адразу становіцца зразумела: ён іх выдатна ведае і любіць, як і густы беларусаў.
— Людзі сталі больш актыўна пераязджаць жыць на прыроду. Многім хочацца абнавіць свае двары і дамы, у тым ліку яркімі, прыгожымі раслінамі. І я іх разумею — сам такі ж. Вазьміце, напрыклад, петуніі — любіміцы ландшафтных дызайнераў і дачнікаў. Іх пышны «шар» з кветак радуе з пачатку лета і да самых замаразкаў, а пах — тонкі і прыемны — толькі ўзмацняецца пад вечар. Вось чаму яны ідэальна падыходзяць для падвесных кашпо, клумбаў і балконных скрынь, — расказвае гаспадар, праводзячы нас міма выстаўленых на сталах вазонаў з раслінамі і кашпо, падвешаных над нашымі галовамі на другім ярусе. 
Не можам не прайсці міма любімчыкаў кветаводаў — бягоній.
— Звярніце ўвагу на неверагодна пышныя суквецці бягоній Калібаха. Яны спалучаюць у сабе рысы раскошнай садовай расліны і простай хатняй. Добрыя і ў кашпо, і на клумбе, — прадаўжае расказ Аляксандр. — У дзясятку папулярных у беларусаў уваходзяць і мае любімыя аксаміткі. Попытам карыстаюцца і сурфініі (ампельныя петуніі) — фаварыты вертыкальнага азелянення. Іх галоўная прывабнасць — у бесперапынным каскадным цвіценні і высокай устойлівасці да капрызаў надвор’я.
Ёсць у асартыменце раслін гаспадара цяплічнай гаспадаркі яшчэ адна модная на сённяшні дзень мнагалетняя расліна — агросціс. Ён выкарыстоўваецца для стварэння элітных газонаў або ў якасці элегантнай хатняй (балконнай) расліны. Ёсць і бакопа — мнагалетняя расліна з сямейства трыпутнікавых. Яна радуе багаццем дробных кветак, якія з’яўляюцца хвалямі — з вясны да самай восені.
— У некаторых аматараў навінак у трэндзе колеусы. Маючы неверагодную палітру лісця, яны з лёгкасцю замяняюць любыя культуры, якія цвітуць, — праводзіць далей для нас «лікбез» Аляксандр Генадзьевіч.
Ён таксама вырошчвае мнагалетнія гваздзікі, якія цэняцца за спалучэнне прастаты, доўгага цвіцення і яркага паху. Яны ўтвараюць густыя вечназялёныя кусцікі, якія не баяцца засухі і халадоў, упрыгожваючы сад з пачатку лета да самых замаразкаў.
Каб справа ішла спарней, Аляксандр Кеўра частку кветак высаджвае з семечка, другую — размнажае чаранкаваннем.
Аглядаючы цяплічныя ўладанні, мы звярнуліся за парадай: што пасадзіць сёлета на сваім участку?
— Высаджваць тыя кветкі, якія даспадобы. Пры гэтым, калі з нейкай кветкай у вас не атрымалася, рэкамендую прадаўжаць эксперыментаваць! Дарэчы, большасць беларускіх кветаводаў так і робяць. Мы з Юліяй не выключэнне — высаджваем кожны год усё новыя і новыя расліны, — дзеліцца герой нашага праекта.
Цікавая ўсё ж такі гэта справа — вырошчванне кветак!
Праект створаны за кошт сродкаў мэтавага збору на вытворчасць нацыянальнага кантэнту.
Тамара МАРКІНА,
фота Раміля НАСІБУЛІНА,
газета «7 дней».
