Ад беспілотнікаў да пеленгатараў: у Мінску завяршылася маштабная выстаўка індустрыі бяспекі
19 чэрвеня, Мінск . Цырымонія закрыцця міжнароднай выстаўкі індустрыі бяспекі «Нацыянальная бяспека. Беларусь-2026» адбылася 19 чэрвеня ў Мінскім міжнародным выставачным цэнтры «БелЭкспа», .
Выстаўка сабрала больш за 120 удзельнікаў з Беларусі, Расіі і Кітая. Яны прадставілі ведамасныя дасягненні і магчымасці ў галіне забеспячэння нацыянальнай бяспекі, абсталяванне і ўзбраенне, арганізацыю прафілактычнай работы і ўзаемадзеянне з грамадзянамі.
Як падкрэсліў дзяржаўны сакратар Савета бяспекі Аляксандр Вальфовіч, бяспека — гэта вынік каманднай работы экспертаў, аналітыкаў, практыкаў, вучоных, прадпрыемстваў і людзей, якія ўмеюць ператвараць задумы ў рэальныя рашэнні.
Найноўшыя дасягненні прадэманстравалі, у прыватнасці, Дзяржкамваенпрам і 13 вядучых арганізацый, якія ўваходзяць у яго сістэму. Прадстаўлена шырокая лінейка сродкаў радыёэлектроннай барацьбы і выяўлення, уключаючы разнастайныя выяўляльнікі, пеленгатары і блакіратары сігналаў мультыкоптараў і FPV-дронаў. Наведвальнікі ўбачылі дасягненні ў галіне беспілотнай авіяцыі і абароны лятальных апаратаў. Сярод іншага на адкрытай пляцоўцы былі выстаўлены ўдарныя беспілотныя авіяцыйныя комплексы.
На палях ІІІ Міжнароднай выстаўкі індустрыі бяспекі была таксама арганізавана шырокая дзелавая праграма. У першы дзень адбыліся адкрытая панэльная дыскусія «Навукова-тэхнічнае і інавацыйнае забеспячэнне нацыянальнай бяспекі дзяржавы», а таксама шостая навукова-практычная канферэнцыя «Асноўныя напрамкі ўдасканалення сістэмы нацыянальнай бяспекі».
Дзелавая праграма другога дня ўключала канферэнцыю «Галіновая кібербяспека ва ўмовах комплекснай лічбавізацыі прамысловасці», ваенна-эканамічную канферэнцыю АДКБ «Развіццё супрацоўніцтва абаронна-прамысловых (ваенна-прамысловых) комплексаў дзяржаў — членаў АДКБ: 20 гадоў практычнага ўзаемадзеяння», круглы стол «Забеспячэнне нацыянальнай бяспекі праз прызму рэалізацыі дзяржаўных навукова-тэхнічных праграм».
Арганізатарамі выстаўкі выступілі Дзяржаўны сакратарыят Савета бяспекі Беларусі, Кіраўніцтва справамі Прэзідэнта Беларусі і Нацыянальны выставачны цэнтр «БелЭкспа». 
Фота Максіма Гучака
