Дзяржстандарт і ВДТУ падпісалі пагадненне аб супрацоўніцтве па падрыхтоўцы кадраў для галіны
Фота Дзяржаўнага камітэта па стандартызацыі 17 ліпеня, Мінск . Дзяржстандарт і Віцебскі дзяржаўны тэхналагічны ўніверсітэт (ВДТУ) аб’ядналі намаганні для падрыхтоўкі кадраў новага пакалення. Аб гэтым паведамілі БЕЛТА ў прэс-службе Дзяржаўнага камітэта па стандартызацыі.
Бакі заключылі пагадненне аб супрацоўніцтве, пад якім паставілі подпісы старшыня Дзяржстандарту Алена Маргунова і рэктар ВДТУ Андрэй Кузняцоў. Дакумент закладзе аснову для павышэння сістэмнага ўзаемадзеяння арганізацый па падрыхтоўцы кадраў у сферы тэхнічнага рэгулявання, стандартызацыі, ацэнкі адпаведнасці і кіравання якасцю.
Як растлумачылі ў Дзяржстандарце, важныя інтэграцыя адукацыйнага працэсу і навукі з вытворчай практыкай, а таксама ўкараненне інавацыйнага, практыка-арыентаванага навучання. «Да навучальнага працэсу ў ВДТУ плануецца актыўна прыцягваць вядучых спецыялістаў сістэмы Дзяржстандарту. Яны будуць весці заняткі, кіраваць курсавымі і дыпломнымі праектамі, удзельнічаць у падагульняючай атэстацыі і размеркаванні выпускнікоў. Праграма супрацоўніцтва таксама прадугледжвае арганізацыю вучэбных і вытворчых практык для студэнтаў на базе арганізацый Дзяржстандарту, павышэнне кваліфікацыі і абмен вопытам; правядзенне сумесных навукова-даследчых работ, профільных семінараў і канферэнцый», — падкрэслілі ў прэс-службе.
Дзяржстандарт зацікаўлены ў высокай гатоўнасці і практычнай базе маладых спецыялістаў, якія прыходзяць у арганізацыі і прамысловыя прадпрыемствы розных галін. «Пытанні стандартызацыі і ацэнкі адпаведнасці выходзяць на ключавы план пры стварэнні прадукцыі і вывадзе яе на ўнутраны і знешні рынкі. Каб гэта было аператыўна рэалізавана, усё большую ролю адыгрываюць кампетэнцыі спецыялістаў у гэтых сферах. Час на ўваход у прафесію пастаянна скарачаецца, і сёння вырашаць задачы трэба тут і цяпер. Таму праводзімую работу па прафарыентацыі моладзі мы вырашылі вывесці на новы ўзровень, заключыўшы такое пагадненне з ВДТУ. Далей гэта практыка будзе прадоўжана і з іншымі профільнымі ВНУ», — пракаменціравала старшыня Дзяржстандарту Алена Маргунова.
Андрэй Кузняцоў таксама падтрымаў ініцыятыву, асабліва адзначыўшы шматбаковую і творчую работу Віцебскага ЦСМС са школьнікамі — будучымі выпускнікамі — па іх уключэнні ў сферу стандартызацыі, метралогіі, сертыфікацыі, якасці, азнаямленні з практыкай работы цэнтра. «Эфект ад гэтага мы ўжо адчуваем: сёлета заявы ад абітурыентаў па спецыяльнасці «метралогія, стандартызацыя і кантроль якасці» былі набраны літаральна ў першыя дні. Пагадненне дазволіць зрабіць гэту работу яшчэ больш карыснай як для студэнцтва, так і ў далейшым для эканомікі краіны. Выпускнікі нашай ВНУ працуюць на прадпрыемствах лёгкай і тэкстыльнай галін, энергетыкі, ІТ і дызайнУ, цэнтраў стандартызацыі, метралогіі і сертыфікацыі», — падкрэсліў ён.
На сустрэчы з рэктарам ВДТУ старшыня Дзяржстандарту абмеркавала дадатковыя напрамкі для супрацоўніцтва, у тым ліку і на міжгаліновым узроўні.
