Якую небяспеку тоіць навальніца, расказалі ратавальнікі
Фота з архіва 9 ліпеня, Мінск . У МНС нагадалі аб фактарах небяспекі пры навальніцах, якія чакаюцца сёння месцамі па краіне, .
У ліку фактараў небяспекі — пашкоджанне, абрыў ліній сувязі і электраперадачы, адключэнне электрычных падстанцый, электраэнергіі ў населеных пунктах. Ёсць рызыкі ўзнікнення лясных пажараў, а таксама пажараў у жылых і вытворчых будынках.
Нагадалі ратавальнікі і аб правілах бяспечных паводзін пры непагадзі. Калі навальніца застала дома, трэба закрыць вокны і коміны, каб пазбегнуць скразняку. Таксама не рэкамендуецца паліць у печцы. У час навальніцы трэба трымацца далей ад электраправодкі, антэн, трэба адключыць радыё і тэлевізар, пазбягаць выкарыстання тэлефона і электрапрыбораў.
На адкрытай мясцовасці важна памятаць: маланка б’е ў самы высокі пункт на сваім шляху. Таму не хавайцеся пад высокія дрэвы, асабліва тыя, якія стаяць асобна. Пры адсутнасці ўкрыцця трэба легчы на зямлю або прысесці ў сухую яму, траншэю, прыгнуўшы галаву.
Калі навальніца застала ў лесе трэба схавацца сярод нізкарослай расліннасці. Калі ад надвор’я хаваюцца адразу некалькі чалавек, то лепш прысесці на кукішкі, не дакранаючыся адзін да аднаго.
У час навальніцы нельга купацца ў вадаёмах, не трэба бегаць. Калі ў момант непагадзі вы едзеце на веласіпедзе або матацыкле — спыніце рух і перачакайце навальніцу на адлегласці прыкладна 30 м ад іх.
Таксама трэба знаходзіцца на адлегласці ад ліній электраперадачы, таму што электрычнасць прыцягвае маланку. Калі пры непагадзі вы знаходзіцеся на ўзвышшы, спусціцеся ўніз. Калі непагадзь застала ў лодцы на вадаёме — трэба рухацца ў бок берага. Пры руху на аўтамабілі трэба спыніцца, закрыць вокны і не выходзіць з машыны.
