Прэзідэнт Манголіі наведаў музей гісторыі ВАВ у Мінску
25 кастрычніка, Мінск . Прэзідэнт Манголіі Ухнаагійн Хурэлсух наведаў Беларускі дзяржаўны музей гісторыі Вялікай Айчыннай вайны ў Мінску,
Высокі госць азнаёміўся з інсталяцыямі аб пачатку вайны, узорамі ваеннай тэхнікі і зброі перыяду Вялікай Айчыннай вайны, экспанатамі аб франтавым жыцці і побыце. Прэзідэнту Манголіі прадэманстравалі экспанаты, звязаныя з акупацыяй Беларусі, партызанскім рухам і антыфашысцкай падпольнай барацьбой, разгромам фашысцкай Германіі і яе саюзнікаў, прадэманстравалі дакументы, узнагароды, асабістыя рэчы і зброю вызваліцеляў Беларусі і Еўропы. 
Агледзеўшы залы музея і прадстаўленыя экспанаты, высокі госць накіраваўся ў Залу Перамогі, дзе пакінуў запіс у Кнізе ганаровых гасцей музея гісторыі Вялікай Айчыннай вайны. 
Беларусь і Манголію звязвае гістарычнае мінулае. Манголія была першай дзяржавай у свеце, якая ў першы ж дзень нападзення нацысцкай Германіі і яе саюзнікаў на Савецкі Саюз безагаворачна і непасрэдна падтрымала краіну дыпламатычным удзелам і ўсімі відамі маральнай і матэрыяльнай дапамогі.
Музей гісторыі Вялікай Айчыннай вайны ў Мінску захоўвае шэраг экспанатаў, якія адлюстроўваюць супрацоўніцтва дзвюх краін у сярэдзіне мінулага стагоддзя. 
У прыватнасці, у другой зале музея гісторыі ВАВ, якая прысвечана міжваеннаму перыяду, прадстаўлены адзін з першых канфліктаў паміж фашысцкімі і антыфашысцкімі сіламі — канфлікт на рацэ Халхін-Гол, якая знаходзіцца на тэрыторыі Манголіі. Тады Японія пацярпела разбуральнае паражэнне, у сувязі з чым не ўступіла ў вайну з Савецкім Саюзам. Савецка-мангольскімі войскамі камандавалі Георгій Жукаў і маршал Мангольскай Народнай Рэспублікі Чайбалсан — у музеі ёсць фатаграфія з гэтымі людзьмі.
У чацвёртай зале вядзецца расказ пра Льва Даватара, які камандаваў 2-м гвардзейскім кавалерыйскім корпусам. Пасля гібелі Даватара ў 1941 годзе корпус узначаліў генерал-маёр Іса Пліеў. Яго кавалерысты змагаліся на конях, перададзеных Савецкаму Саюзу Манголіяй — гэта краіна перадала 500 тыс. коней.
Яшчэ адзін гістарычна важны факт успамінаюць у зале №8, прысвечанай вызваленню краін Цэнтральнай і Паўднёва-Усходняй Еўропы. У 1943 годзе ў склад 112-й танкавай брыгады была ўведзена калона танкаў Т-34 і Т-70, пабудаваная на сродкі Манголіі і названая «Рэвалюцыйная Манголія». Танкавая калона дайшла да Берліна, а двойчы Герой Савецкага Саюза, ураджэнец Магілёўскай вобласці, які ўзначальваў штаб танкавай брыгады, Іосіф Гусакоўскі быў узнагароджаны вышэйшай дзяржаўнай узнагародай Манголіі — Ордэнам Сухэ-Батара і Ордэнам Баявога Чырвонага Сцяга. 
Прэзідэнт Манголіі Ухнаагійн Хурэлсух прыбыў з афіцыйным візітам у Беларусь 24 кастрычніка. Акрамя музея гісторыі ВАВ высокі госць наведаў таксама Адукацыйны цэнтр бяспекі жыццядзейнасці МНС. Афіцыйны візіт Прэзідэнта Манголіі прадоўжыцца па 26 кастрычніка. На гэту ж дату запланавана асноўная перагаворная праграма на ўзроўні кіраўнікоў дзяржаў. 
Фота Яна Гарбанюка
