АПК, навука, энергетыка. Гомельская вобласць і кітайская правінцыя Цзілінь развіваюць партнёрства
Фота Гомельскага аблвыканкама 21 кастрычніка, Гомель . Старшыня Гомельскага аблвыканкама Іван Крупко ў час візіту дэлегацыі паўднёва-ўсходняга рэгіёна ў Кітай сустрэўся з губернатарам правінцыі Цзілінь Ху Юйцінам. Галоўнай тэмай перагавораў стала супрацоўніцтва паміж двума рэгіёнамі, паведамілі ў аблвыканкаме.
Як адзначыў Іван Крупко, за апошнія пяць гадоў тавараабарот Гомельскай вобласці з Кітаем вырас больш як у 2,5 раза. Паводле слоў кіраўніка вобласці, сёння ёсць усе ўмовы, каб перайсці ад агульнага стратэгічнага партнёрства да канкрэтных узаемавыгадных праектаў. «Для нас правінцыя Цзілінь — перспектыўны партнёр, асабліва ў тых сферах, дзе нашы эканомікі найбольш узаемадапаўняльныя», — звярнуў увагу старшыня аблвыканкама.
Ключавымі напрамкамі далейшага супрацоўніцтва Іван Крупко назваў сумесную вытворчасць сельскагаспадарчай тэхнікі, пастаўку з Беларусі прадуктаў харчавання і прадукцыі дрэваапрацоўкі, закупку з Кітая высокатэхналагічнага абсталявання. Перспектыўным з’яўляецца стварэнне сумесных інвестпраектаў у аграпрамысловым комплексе, узаемадзеянне ў сферы адукацыі і навукі, развіццё турыстычнага патэнцыялу.
Губернатар правінцыі Цзілінь лічыць, што таксама важна ўмацоўваць сувязі ў галіне энергетыкі, гандлю, фармацэўтыкі, гуманітарнай сферы. «Упэўнены, што ў вас шматгадовыя планы на эфектыўнае супрацоўніцтва з нашым рэгіёнам, і мы гатовы іх падтрымаць. Падобны клімат і агульныя інтарэсы па асобных напрамках дадуць магчымасць паглыбляць супрацоўніцтва ў многіх галінах», — упэўнены Ху Юйцін.
Кітайскія партнёры зацікаўлены ў сумесным развіцці зялёнай энергетыкі, паліўнай прамысловасці з акцэнтам на экалогію.
Вынікам сустрэчы стала падпісанне пагаднення аб супрацоўніцтве паміж Гомельскай вобласцю і правінцыяй Цзілінь. Дакумент завізіравалі кіраўнікі рэгіёнаў Іван Крупко і Ху Юйцін.
Іван Крупко запрасіў дзелавыя колы правінцыі Цзілінь на Гомельскі эканамічны форум у маі 2027 года. Таксама дасягнута дамоўленасць аб прэзентацыі эканамічнага і культурнага патэнцыялу Гомельскай вобласці на Кітайска-Паўночнаазіяцкай выстаўцы ў наступным годзе пры садзейнічанні правінцыі Цзілінь.
