Ад дэбютаў да прызнаных шэдэўраў. Што ўбачаць гледачы кінафестывалю «Лістапад»
16 кастрычніка, Мінск . У асноўным конкурсе ігравога кіно ХХХII Мінскага міжнароднага кінафестывалю «Лістапад» прадставяць 17 фільмаў. Аб гэтым журналістам расказала праграмны дырэктар асноўнага конкурсу ігравога кіно Яніка Прасцінская,
XXХII Мінскі міжнародны кінафестываль «Лістапад» пройдзе з 30 кастрычніка па 6 лістапада пад слоганам «Глядзі. Жыві. Шануй». Удзельнікамі конкурсу стануць больш за 130 фільмаў з 55 краін. Паказы пройдуць на пяці ключавых пляцоўках Мінска: у кінатэатрах «Масква», «Перамога», «Цэнтральны», «Беларусь» і «Піянер».
Ігравое кіно
«Мы паказваем 17 фільмаў у кінатэатры «Цэнтральны». У праграме ёсць кінастужкі, якія знойдуць водгук у гледачоў розных узростаў. У адной з іх можна прасачыць шлях станаўлення ад дзіцяці-падлетка да дзяўчыны, якая ўмее пераадольваць складанасці, у другой — убачыць, як узаемадзейнічаюць паміж сабой пары ў розны перыяд часу. Асобныя работы арыентаваны не на тое, каб пачуць шмат дыялогаў, а каб паназіраць за людзьмі і проста атрымаць асалоду ад прыроды і велічы розных краін, убачыць, як кінематограф з суседніх дзяржаў і кантынентаў аб’ядноўвае людзей і паказвае гісторыі, падобныя для людзей незалежна ад рэлігіі і веравызнання», — падкрэсліла Яніка Прасцінская.
Дакументалістыка
У праграме неігравога кіно 18 дакументальных фільмаў. Паводле слоў праграмнага дырэктара Марыны Белавокай, асноўнымі тэмамі сталі экалогія, этнічная разнастайнасць, пераўтварэнне жыцця вакол сябе ўласнымі сіламі, мастацтва. «Галоўная каштоўнасць дакументальнага кіно — чалавек. Вы зможаце ўбачыць шмат цудоўных, выдатных, неардынарных людзей, на першы погляд звычайных, але якія ажыццяўляюць абсалютна неверагодныя фантазіі», — дадала яна.
Нацыянальны конкурс
Праграмны дырэктар «Нацыянальнага конкурсу» Аляксандр Пятровіч падкрэсліў, што заявак у гэтым годзе паступіла значна больш у параўнанні з мінулым. Разам з прафесійнымі рэжысёрамі іх падавала і моладзь. Кінематаграфісты выбіралі тэмы, якія хвалююць кожнага беларуса: мужнасць, дабрыня і надзвычайны характар беларусаў, іх стойкасць і любоў да Радзімы, клопат пра блізкіх. Не абышлі і тэму Чарнобыля. Яна чырвонай лініяй прысутнічала ў пададзеных матэрыялах.
Праграма для дзяцей і юнацтва
Традыцыйна ў кінатэатры «Піянер» з 31 кастрычніка па 4 лістапада пройдзе конкурс фільмаў для дзіцячай і юнацкай аўдыторыі «Лістападзік». «Адабрана 10 фільмаў, з іх дзве анімацыйныя поўнаметражныя карціны і восем ігравых фільмаў. Геаграфія краін самая розная: ад Мексікі і Фінляндыі да Турцыі і Казахстана. На конкурснай арэне шмат дэбютантаў. Адкрыццё будзе феерычнае. Мы заўсёды прыцягваем дзіцячую і сямейную аўдыторыю і спадзяёмся і ў гэтым годзе яе прыемна здзівіць», — сказала праграмны дырэктар «Лістападзіка» Кацярына Тамковіч-Латута.
Анімацыя для розных узростаў
«Конкурс анімацыйных фільмаў пройдзе ў кінатэатры «Беларусь» з 31 кастрычніка па 3 лістапада, — расказаў праграмны дырэктар конкурсу анімацыйных фільмаў Канстанцін Андрушачкін. — Гледачы ўбачаць выдатныя ўзоры сусветнага анімацыйнага мастацтва. У конкурснай праграме — 50 аўтарскіх анімацыйных фільмаў хронаметражом ад 5 да 29 мінут з 23 краін. З іх 14 прызначаны для дзіцячай аўдыторыі і 36 — для дарослай. Праграма ўключае пяць зборнікаў кінасеансаў. Больш за ўсё фільмаў з Расіі, шмат з Францыі і Ірана, якія з’яўляюцца вядучыміі краінамі ў галіне анімацыі».
Кіно маладых
Праграмны дырэктар «Кіно маладых» Паліна Арцюкоўская адзначыла, што ў гэтым годзе апрацавана вялізная колькасць заявак, а ў праграму трапіла 11 фільмаў з Германіі, Аргенціны, Партугаліі, Кітая, М’янмы, Індыі і Расіі. Большасць фільмаў ужо ўдзельнічала ў міжнародных фестывалях і нават атрымала прэстыжныя ўзнагароды. Пры апрацоўцы заявак арганізатары заўважылі, што рэжысёры з розных краін, не знаёмыя адзін з адным, асвятлялі адны і тыя ж пытанні, напрыклад пошук свайго жыццёвага шляху. Кожны рабіў гэта па-свойму, але ўсе фільмы пераклікаюцца са слоганам фестывалю.
Кароткі метр
Запланаваны паказ 10 фільмаў у кінатэатры «Масква». За адзін сеанс можна будзе паглядзець два фільмы, акунуцца ў гісторыю, даведацца для сябе пра нешта новае і цікавае. Як заўважыла праграмны дырэктар конкурсу Вольга Котава, у гэтым годзе, акрамя традыцыйных фільмаў з Кітая, Ірана і Індыі, можна будзе ўбачыць кіно з Канады, В’етнама, Тайланда і Эстоніі.
Пазаконкурсная праграма
Традыцыйна запланаваны Дні кінематаграфій Беларусі, Казахстана, Пакістана, Расіі, Індыі і Кітая. У гэтым годзе яны будуць прысвечаны жанчынам. Пройдуць майстар-класы і творчыя сустрэчы ў БДАМ, БДУКМ, «Доме Масквы» і Нацыянальнай кінастудыі «Беларусьфільм». Генеральны дырэктар кінастудыі Дзмітрый Сямёнаў дадаў, што яны таксама арганізуюць у сябе экскурсіі, але колькасць месцаў будзе абмежавана па папярэднім запісе. У рамках пазаконкурснай праграмы адбудзецца сацыяльна-гуманітарная акцыя «Кіно без меж», арганізаваная разам з Рассупрацоўніцтвам.
Цэны
Генеральны дырэктар УП «Кінавідэапракат» Мінгарвыканкама Уладзімір Карачэўскі падкрэсліў, што продажы білетаў на конкурсныя і пазаконкурсныя фільмы пачнуцца з наступнага тыдня. Цэны, паводле яго слоў, будуць дэмакратычнымі: самы дарагі білет на вячэрнія паказы ігравога кіно — 12 рублёў, самы танны на кароткі метр — 5 рублёў. Вопыт мінулага года паказвае, што білеты лепш купляць загадзя.
«Цэны даволі дэмакратычныя. Самая вялікая — на вячэрнія паказы ігравога кіно (12 рублёў), самая нізкая — на кароткі метр (5 рублёў). Ажыятаж на некаторыя фільмы даволі вялікі, таму лепш набываць білеты загадзя», — рэзюмаваў Уладзімір Карачэўскі.
