Гандаль, тэхніка, АПК. У якіх напрамках Беларусь і Ленінградская вобласць развіваюць супрацоўніцтва
30 верасня, Мінск . У Мінску праходзіць 14-е пасяджэнне сумеснай камісіі па развіцці супрацоўніцтва Беларусі і Ленінградскай вобласці,
Першы намеснік прэм’ер-міністра Мікалай Снапкоў адзначыў, што Ленінградская вобласць стабільна ўваходзіць у дзясятку вядучых гандлёвых партнёраў Беларусі. «Мерапрыемствы па далейшым нарошчванні ўзаемнага гандлю зацверджаны дагаворамі супрацоўніцтва на 2026-2027 гады. Яны дастаткова амбіцыйныя», — сказаў ён. 
Пры гэтым Мікалай Снапкоў адзначыў, што праграмы супрацоўніцтва прадугледжваюць пастаўкі расійскім партнёрам каля 2 тыс. адзінак тэхнікі, шырокую наменклатуру прамысловых і харчовых тавараў, рэалізацыю сумесных праектаў у сацыяльна-культурнай сферы. «Наш новы напрамак — энергетычнае абсталяванне, якое сёння з’яўляецца ў большай ступені для Ленінградскай вобласці рэзервовым, але пры гэтым нясе базавую функцыю бяспекі энергетычнай інфраструктуры рэгіёна. Верагодна, гэта яшчэ больш павялічыць і без таго ўражальны аб’ём узаемнага тавараабароту», — канстатаваў ён.
Паводле яго слоў, прыярытэтнымі напрамкамі супрацоўніцтва застаюцца аграпрамысловы комплекс і сфера жыллёва-камунальнай гаспадаркі. «Адным з драйвераў далейшага насычэння рынку якаснымі беларускімі прадуктамі можа стаць развіццё гандлёвых аб’ектаў «Беларуская вёска». Паспяховы вопыт лакацый гэтых пунктаў продажу пацверджаны ў Маскве, Санкт-Пецярбургу, Архангельску, Петразаводску. Цяпер мы падбіраем памяшканні для адкрыцця такіх магазінаў у Мурыне, Усевалажску і Гатчыне. Акрамя таго, у красавіку кіраўнік нашай дзяржавы паставіў задачу па адраджэнні рыбаводства ў Беларусі. У бліжэйшай перспектыве плануецца будаўніцтва стронгавых і асятровых ферм. Нам уяўляецца мэтазгодным максімальнае партнёрства з рыбагадавальнікамі Ленінградскай вобласці. У нас напрацаваны паспяховыя кампетэнцыі ў Магілёўскай вобласці, але абмен вопытам не будзе лішнім», — падкрэсліў першы віцэ-прэм’ер. 
Што датычыцца паставак тэхнікі (МАЗ, МТЗ, «АМКАДОР»), якія, паводле слоў Мікалая Снапкова, адыгрываюць немалаважную ролю ў пазітыўнай дынаміцы эканамічнага ўзаемадзеяння, беларускі бок гатовы нарошчваць гэтыя пастаўкі, а таксама прапаноўваць пасажырскую тэхніку. Пры гэтым выказана гатоўнасць прадастаўляць індывідуальныя выгадныя фінансавыя праграмы пад усе закупкі.
«Кожная наша сустрэча — не проста чарговае пасяджэнне, а пляцоўка для выпрацоўкі канкрэтных, вымерных алічбаваных рашэнняў. Назапашаны вопыт і дынаміка ўзаемадзеяння паказваюць эфектыўнасць нашага супрацоўніцтва. Мы гатовы аператыўна разглядаць любыя ініцыятывы па аптымізацыі двухбаковага супрацоўніцтва і аказваць ім усебаковае садзейнічанне», — рэзюмаваў Мікалай Снапкоў. 
Губернатар Ленінградскай вобласці Аляксандр Драздзенка ў сваю чаргу адзначыў, што Беларусь з’яўляецца для рэгіёна ключавым сістэмным гандлёвым партнёрам. «Аб гэтым сведчаць падагульняючыя лічбы за 2025 год і тэмпы росту за сем месяцаў бягучага года. Мы працуем сістэмна, падпісаны новыя дарожныя карты на 2026-2027 гады. Гэтыя дакументы аб’ядноўваюць нашы намаганні ад эканомікі да гуманітарных сувязей. Мы прадаўжаем актыўна працаваць па закупцы тэхнікі для сельскай гаспадаркі: толькі за паўгода закупілі 75 адзінак беларускай тэхнікі. Пры гэтым мы прадаўжаем субсідзіраваць тэхніку і на бліжэйшыя тры гады захаваем субсідзіраванне. У планах да канца года — прадаўжаць закупляць беларускую тэхніку», — праінфармаваў губернатар.
У ходзе мерапрыемства бакі падпісалі пратакол 14-га пасяджэння Сумеснай камісіі па развіцці супрацоўніцтва Рэспублікі Беларусь і Ленінградскай вобласці Расійскай Федэрацыі, план мерапрыемстваў на 2027-2029 гады па рэалізацыі пагаднення паміж Брэсцкім абласным выканаўчым камітэтам і ўрадам Ленінградскай вобласці аб супрацоўніцтве ў гандлёва-эканамічнай, навукова-тэхнічнай і сацыяльна-культурнай сферах, а таксама план мерапрыемстваў на 2026-2028 гады па рэалізацыі пагаднення паміж Мінскім абласным выканаўчым камітэтам і ўрадам Ленінградскай вобласці аб супрацоўніцтве ў гандлёва-эканамічнай, навукова-тэхнічнай і сацыяльна-культурнай сферах.
Фота Сяргея Шэлега
