Устойлівая работа і высокія паказчыкі. Абноўленая Рэспубліканская дошка Гонару адкрылася ў Мінску
29 красавіка, Мінск . Абноўленая Рэспубліканская дошка Гонару адкрылася ў Мінску,
«Гэта ўжо добрая традыцыя — напярэдадні Свята працы (1 мая) сустракацца на плошчы Дзяржаўнага сцяга, каб ушаноўваць пераможцаў, удастоеных занясення на Рэспубліканскую дошку Гонару», — сказаў журналістам міністр эканомікі Юрый Чабатар.
Паводле яго слоў, бягучы год з’яўляецца ўнікальным, паколькі падводзяцца вынікі не толькі за 2025-ы год, але і за пяцігодку. «Барацьба была даволі вялікая, удзельнічала 200 арганізацый, а 53 удастоіліся ўзнагароджання. Сярод рэгіёнаў (адміністрацыйна-тэрытарыяльных адзінак. — Заўвага БЕЛТА) удзельнічала больш за 20, пераможцамі сталі 11, у іх ліку Брэсцкая і Мінская вобласці», — адзначыў міністр.
Юрый Чабатар падкрэсліў, што крытэрыі адбору вельмі простыя, але вытрымаць іх даволі складана. «Першы крытэрый — устойлівая работа і высокія паказчыкі ў параўнанні з іншымі прэтэндэнтамі. Другі — выключная працоўная і вытворчая дысцыпліна. Трэці — уплыў на рэзультаты ў краіне. Усё гэта разам складваецца, ацэньваецца — і лепшыя аказваюцца на Дошцы гонару», — растлумачыў ён і дадаў, што дзяржава шануе ўклад кожнага ў дасягненне высокіх паказчыкаў краіны.
Першы намеснік старшыні Мінгарвыканкама Аляксандр Камендант пракаменціраваў занясенне Мінска на Дошку гонару. «Напярэдадні дня ўсіх працаўнікоў мы ўшаноўваем лепшых, і ў гэтым годзе традыцыйна Мінск стаў лепшым па выніках 2025 года. На гэта паўплываў комплекс паказчыкаў сацыяльна-эканамічнага развіцця, аб’ёмныя паказчыкі ў прамысловасці і сацыяльнай сферы, — адзначыў ён. — Гэта знакавая падзея для нас, паколькі Мінск забяспечвае трэць ВУП Беларусі, больш за палову прамых замежных інвестыцый на чыстай аснове, каля 50 працэнтаў экспарту паслуг у цэлым па краіне і больш за палову аптовага абароту. Радасна прызнаваць, што на Дошку гонару занесены і дзве гарадскія адміністрацыі — Маскоўскі і Першамайскі раёны». 
Гэты год з’яўляецца знамянальным для Мінска, паколькі амаль 20 мясцовых арганізацый таксама сталі пераможцамі і маштабна прадстаўлены на Рэспубліканскай дошцы Гонару. «Удвая прыемна, што Мінскі парнікова-цяплічны камбінат двойчы запар удастоены перамогі», — сказаў першы намеснік старшыні.
Прэзідэнт Беларусі Аляксандр Лукашэнка 23 красавіка падпісаў указ нумар 138 «Аб занясенні на Рэспубліканскую дошку Гонару пераможцаў спаборніцтваў за 2021-2025 гады і 2025 год». Указам вызначаны пераможцы спаборніцтваў, якія дасягнулі высокіх вынікаў у сферы сацыяльна-эканамічнага развіцця.
У іх ліку 11 адміністрацыйна-тэрытарыяльных адзінак: Брэсцкая і Мінская вобласці, Мінск, Жабінкаўскі і Камянецкі раёны Брэсцкай вобласці, Нясвіжскі і Салігорскі раёны Мінскай вобласці, Горацкі раён Магілёўскай вобласці, Брэст, Маскоўскі і Першамайскі раёны Мінска.
На Рэспубліканскую дошку Гонару таксама занесены дзевяць арганізацый прамысловасці, тры арганізацыі, якія ажыццяўляюць дзейнасць у будаўніцтве, дзевяць арганізацый сельскай і рыбнай гаспадаркі, дзве арганізацыі лясной гаспадаркі, 30 арганізацый сферы паслуг (арганізацыі гандлю, адукацыі, аховы здароўя, навукі, культуры, сацыяльнага абслугоўвання і іншыя).
Занясенне на Рэспубліканскую дошку Гонару з’яўляецца грамадскім прызнаннем важкага ўкладу рэгіёнаў і калектываў прадпрыемстваў у сацыяльна-эканамічнае развіццё і рост дабрабыту краіны, што служыць стымулюючым фактарам для дасягнення яшчэ больш высокіх вынікаў у будучым.
Фота Таццяны Матусевіч
