У сталіцы 13 работнікаў розных галін удастоены звання «Мінчанін года»
12 верасня, Мінск . Адным з цэнтральных мерапрыемстваў святочнай праграмы, прысвечанай Дню горада, стала ўрачыстая цырымонія прысваення ганаровага звання «Мінчанін года», якога ўдастоены 13 прадстаўнікоў розных галін,
Віншуючы лепшых у сваёй прафесійнай дзейнасці з высокім званнем, старшыня Мінгарвыканкама Уладзімір Кухараў адзначыў, што свята сталіцы аб’ядноўвае многія пакаленні мінчан, якія на працягу доўгіх гадоў будавалі і добраўпарадкоўвалі горад. 
«Сёння мы, нашчадкі тых выдатных людзей, павінны быць разам і рабіць усё, каб горад заставаўся такім жа ўтульным, прыгожым, квітнеючым і камфортным для пражывання. Я хачу падзякаваць усім, хто прымае ў гэтым удзел, застаючыся на сваім рабочым месцы. Сёння мы ўшаноўваем тых, хто дасягнуў у прадстаўленых галінах сапраўднага майстэрства. Гэта вынік шматгадовай карпатлівай працы, удасканалення, заваявання новых вышынь. Вы прыклад для іншых, вы тыя, хто бярэцца за самую цяжкую работу, якая прыносіць радасць людзям і карысць нашаму гораду і краіне», — сказаў Уладзімір Кухараў.
Сярод удастоеных звання «Мінчанін года» — інжынер-тэхнолаг вытворча-тэхналагічнага аддзела кандытарскай фабрыкі «Слодыч» Вольга Рончык. Як падкрэсліла мінчанка, прадпрыемства, дзе яна працуе 33 гады, у літаральным сэнсе вырасціла яе як спецыяліста. 
«Я прайшла шлях на вытворчасці ад вытворцы бісквітаў да інжынера-тэхнолага. Шмат што змянілася з тых часоў, але непарушным застаецца якасць нашай прадукцыі і выдатны калектыў. Хачу сказаць, што любоў да прафесіі супрацоўнікаў нашага прадпрыемства спажыўцы адчуваюць у кожным нашым вырабе. Таму прысвоенае званне лічу заслугай нашага калектыву, які балее за агульную справу. І я ганаруся, што з’яўляюся яго часткай», — падзялілася Вольга Рончык, дадаўшы, што на фабрыцы актыўна працуюць над новымі рэцэптурамі, таму ўжо ў бліжэйшай будучыні парадуюць аматараў сталічнага пячэння чарговымі прысмакамі.
«Усё маё жыццё прайшло ў Мінску, і я вельмі люблю свой горад. Ён прыгожы, утульны, чысты, квітнеючы, добраўпарадкаваны. Таму рада прыносіць карысць гораду і краіне», — адзначыла Вольга Рончык.
Майстар вытворчага навучання Мінскага дзяржаўнага каледжа кулінарыі Алена Казун расказала, што ў сферы прафпадрыхтоўкі кадраў працуе больш за чвэрць стагоддзя. 
«У Мінску жыву амаль 20 гадоў і рада, што пашанцавала пераехаць у сталіцу. Мне падабаецца працаваць з моладдзю, быць з імі на адной хвалі, ствараючы захапляючы свет нашай прафесіі, якая запатрабавана не толькі ў Мінску, але і ва ўсёй краіне ў цэлым. Мы стараемся ісці ў нагу з часам, укараняючы новыя тэхналогіі, новае абсталяванне, каб нашы выпускнікі мелі магчымасць працаваць у самых прэстыжных аб’ектах грамадскага харчавання», — звярнула ўвагу Алена Казун.
Тое, як мяняўся Мінск і як раслі яго мікрараёны, добра ведае машыніст аўтамабільнага крана ААТ «Будтрэст №35» Юрый Рамановіч. «У маёй працоўнай кніжцы — адзін запіс. Атрымаў размеркаванне ў свой трэст пасля заканчэння вучылішча 37 гадоў таму, так і працую. Ганаруся тым, што будую Мінск, у гэтым бачу сваё прызванне. Прысваенне такога высокага звання, як «Мінчанін года», — ганарова, але і адказна, я пастараюся апраўдаць давер», — сказаў Юрый Рамановіч. 
Лепшыя музычныя нумары для ўдзельнікаў цырымоніі прагучалі ў выкананні Прэзідэнцкага аркестра Рэспублікі Беларусь.
Фота Максіма Гучака
