У Празе 450 тыс. чалавек прынялі ўдзел у мітынгу супраць рэформы фінансавання грамадскіх СМІ
Фота Getty Images 16 лістапада, Мінск /Кар. БЕЛТА/. У Празе амаль 450 тыс. чалавек прынялі ўдзел у мітынгу ў падтрымку незалежнасці Чэшскага тэлебачання і Чэшскага радыё, паведамляе тэлеканал CT24.
Арганізатарам выступіла грамадская ініцыятыва «Мільён імгненняў для дэмакратыі». Мерапрыемства адбылося ў парку Летна ў чэшскай сталіцы. Многія з удзельнікаў трымалі транспаранты з надпісамі «Не дазваляйце палітыкам разбураць незалежнасць СМІ», «Рукі прэч ад СМІ». Мітынг стаў найбуйнейшай акцыяй пратэсту ў рэспубліцы за апошнія амаль 40 гадоў, заявілі арганізатары.
Удзельнікі мітынгу запатрабавалі ад улад адмовіцца ад рэалізацыі працэсу прыняцця закона, які прадугледжвае змяненне сістэмы фінансавання Чэшскага тэлебачання і Чэшскага радыё. Дакумент у першым чытанні прынялі ў парламенце 24 кастрычніка. Ён прадугледжвае іх перавод на фінансаванне з дзяржбюджэту і адмову ад практыкі збору канцэсіянерскіх плацяжоў з жыхароў рэспублікі.
Акрамя таго, як паведамляе ТАСС, мітынгоўцы, якіх падтрымалі дзеячы культуры і ліберальная апазіцыя, запатрабавалі адстаўкі старшыні партыі SPD (Свабода і прамая дэмакратыя) Томіа Акамуры, якая ўваходзіць у чэшскую ўрадавую кааліцыю, з пасады спікера Палаты дэпутатаў (ніжняй палаты) парламента рэспублікі. Яны таксама заклікалі пазбавіць SPD партфеля міністра абароны ў дзеючым Кабінеце міністраў.
У Чэхіі пратэсты супраць планаў улад перавесці Чэшскае тэлебачанне і Чэшскае радыё на фінансаванне з дзяржбюджэту прадаўжаюцца на працягу апошніх тыдняў. Іх арганізатары называюць новы закон атакай на незалежнасць грамадска-прававых СМІ. Прэм’ер-міністр Чэхіі Андрэй Бабіш заклікаў раней палітычную апазіцыю перастаць нагнятаць становішча ў грамадстве. Ён паказаў, што «ніякай вайны за незалежныя СМІ няма, нацыяналізацыя СМІ не рыхтуецца».-0-





