У Беларусі рэалізаваны пілотны праект па цэнтралізаваных закупках сродкаў аховы раслін на біржавых таргах
Фота з архіва 15 верасня, Мінск . У Беларусі рэалізаваны пілотны праект па цэнтралізаваных закупках сродкаў аховы раслін на біржавых таргах. Аб гэтым паведамілі ў прэс-службе Беларускай універсальнай таварнай біржы.
«Больш за 7 млн рублёў склала агульная сума біржавых здзелак, заключаных на БУТБ у час эксперыменту па закупцы сродкаў аховы раслін з ростарэгулюючым дзеяннем для азімага рапсу. Эксперымент праводзіўся ў адпаведнасці з пастановай Савета Міністраў ад 4 жніўня 2026 года № 396 з мэтай павышэння эфектыўнасці і празрыстасці закупачнай дзейнасці прадпрыемстваў аграпрамысловага комплексу. У мэтах выканання даручэння ўрада на БУТБ былі арганізаваны тры гандлёвыя сесіі, удзел у якіх у якасці пакупнікоў прынялі 171 сельгаспрадпрыемства з усіх абласцей краіны. У выніку былі заключаны 224 біржавыя здзелкі па куплі 87285 л рэгулятару росту раслін», — адзначылі ў БУТБ.
У час біржавых таргоў прымяняўся алгарытм зваротнага аўкцыёну (на паніжэнне цаны), што разам з высокай канцэнтрацыяй прадаўцоў дазволіла стварыць неабходнае канкурэнтнае асяроддзе і спрыяльныя ўмовы для пакупнікоў.
«Выкарыстанне біржы ў якасці пляцоўкі для рэалізацыі пілотнага праекта па цэнтралізаваных закупках сродкаў аховы раслін абумоўлена празрыстасцю і канкурэнтным характарам біржавога механізма. На таргі былі прыцягнуты 28 пастаўшчыкоў гэтай прадукцыі», — расказалі ў прэс-службе таварнай біржы.
За восем месяцаў 2026 года на біржавых таргах БУТБ для ўнутранага рынку рэалізаваны сродкі аховы раслін і ўгнаенні на 268,4 млн рублёў. У якасці пакупнікоў здзелкі заключалі 427 арганізацый, а ў якасці прадаўцоў — 112.
ААТ «Беларуская ўніверсальная таварная біржа» створана ў 2004 годзе. Першыя таргі адбыліся ў чэрвені 2005 года. БУТБ — адна з буйнейшых таварных бірж ва Усходняй Еўропе. Яе галоўная функцыя — садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
