У Беларусі актуалізаваны парадак прымянення турыстычных сімвалаў і пералік відаў турызму
Фота з архіва 21 кастрычніка, Мінск . Зацверджана палажэнне аб сістэме турыстычнай арыентуючай інфармацыі і актуалізаваны класіфікацыйныя прыкметы відаў турызму. Гэта прадугледжана пастановай Нацыянальнага агенцтва па турызме ад 15 кастрычніка 2026 года №9, якая апублікавана на Нацыянальным прававым інтэрнэт-партале, .
Пералік відаў турызму ўключае 13 пазіцый. Гэта аграэкатурызм, актыўны, гастранамічны, дзелавы, гісторыка-культурны, лячэбна-аздараўленчы, медыцынскі, адукацыйны, паляўнічы, прамысловы, рэлігійны, падзейны і экалагічны турызм. Дадзены азначэнні кожнага з іх.
Таксама абазначаны прававы статус сістэмы турыстычнай арыентуючай інфармацыі, парадак яе прымянення з выкарыстаннем турыстычных сімвалаў (піктаграм). Сістэма такой інфармацыі грунтуецца на прынцыпах інфарматыўнасці, нагляднасці, аднастайнасці візуальных элементаў, эстэтыкі і талерантнасці.
Турыстычныя знакі (піктаграмы) адлюстроўваюцца ў форме квадрата на зялёным фоне з тэкстурай знака белага колеру — для абазначэння турыстычных інфармацыйных цэнтраў, у форме квадрата з белым абрамленнем на карычневым фоне з тэкстурай знака жоўтага колеру — для іншых турыстычных сімвалаў. Яны адлюстроўваюцца ў каляровым, а таксама чорна-белым варыянце (для асоб з парушэннямі зроку) з захаваннем ідэнтычнасці іх тэкстуры.
Турыстычныя інфармацыйныя носьбіты размяшчаюцца ў адпаведнасці з рашэннем мясцовых выканаўчых і распарадчых органаў на ўчастках пешаходнага руху, у месцах раздзялення пешаходных маршрутаў, пры выхадзе з падземных пераходаў, на асабліва ахоўных прыродных тэрыторыях, на тэрыторыі прыпынкаў транспарту агульнага карыстання, у зоне станцый метрапалітэна, пры выхадзе з чыгуначных вакзалаў, аўтавакзалаў, рачных вакзалаў, аэрапортаў, на тэрыторыі помнікаў гісторыі, культуры, архітэктуры, у гасцініцах і інш. Яны могуць быць асобна ўстаноўленымі, кансольнымі або лічбавымі.
Пастанова ўступае ў сілу пасля яе афіцыйнага апублікавання і распаўсюджвае сваё дзеянне на адносіны, якія ўзніклі з 24 верасня 2026 года.
