Выстава «Марк Шагал. Над горадам» адкрылася ў Віцебску
16 ліпеня, Віцебск . Карціна Марка Шагала «Над горадам» упершыню экспануецца на «Славянскім базары». Выстава з шэдэўрам мастака і ўраджэнца Віцебска адкрылася ў Мастацкім музеі ў фестывальнай сталіцы,
Карціну ў Віцебск прывезлі з Траццякоўскай галерэі. Пад твор майстра ў Мастацкім музеі абсталявалі асобную залу.
Вяртанне знакамітага палатна на радзіму мастака стала сапраўды гістарычнай падзеяй. Жыхары і госці горада цяпер змогуць убачыць работу, напісаную ў 1914-1918 гадах і ўвасобіўшую ўнікальны свет майстра, дзе рэальнасць сплятаецца з марай і паэзіяй. Карціна з’яўляецца гімнам каханню Шагала да яго любімай жонкі Бэлы. Лунаючыя над Віцебскам закаханыя сімвалізуюць сілу пачуццяў, якія пераадолелі зямное прыцяжэнне. Асабліва каштоўнае ў творы — дэталёвае адлюстраванне гістарычнага Віцебска пачатку XX стагоддзя. На палатне можна пазнаць Палац губернатара, абрысы страчанай Спаса-Праабражэнскай царквы, дом з чырвонай цэглы, дзе цяпер размешчаны Арт-цэнтр Шагала. Дзякуючы пэндзлю майстра захавалася выява горада, якога ўжо не існуе. Тэма палёту, упершыню ярка ўвасобленая тут, у далейшым стала ключавым сімвалам свабоды і духоўнай незалежнасці ў творчасці мастака.
Экспазіцыю дапаўняе «Партрэт Марка Шагала», напісаны ў 1914 годзе яго настаўнікам Юрыем Пэнам. Палатно прадастаўлена Нацыянальным мастацкім музеем Беларусі. Гэта суседства дазваляе глыбей зразумець вытокі творчасці Марка Шагала.
Міністр культуры Марат Маркаў, які прыняў удзел у прэзентацыі выставы, падкрэсліў, што і для Віцебска, і для Беларусі гэта гістарычны момант. «Упершыню карціна «Над горадам», няхай і часова, але вярнулася ў Віцебск, на радзіму свайго аўтара. Тым больш у год 35-годдзя фестывалю, куды збіраецца вялікая колькасць людзей з усяго свету, гэта падзея важна як для віцябчан, так і любога чалавека, неабыякавага да мастацтва», — адзначыў ён.
Генеральны дырэктар Дзяржаўнай Траццякоўскай галерэі Вольга Галакціёнава расказала, што дзякуючы настойлівасці дырэктара Віцебскага абласнога краязнаўчага музея Таццяны Старынскай і многім фактарам, якія склаліся на карысць праекта, яго ўдалося рэалізаваць. «Цяпер мы на гістарычнай радзіме гэтага цудоўнага твора, разумеем, што гэта важная частка ўзаемадзеяння і нашага агульнага культурнага кода з Беларуссю, агульнага дыялогу. Я думаю, гэта не апошняе наша ўзаемадзеянне. Думаю, з Беларусі і Віцебска ў прыватнасці ў Расію прыбудуць нейкія праекты», — сказала кіраўнік Траццякоўскай галерэі.
Яна таксама адзначыла, што практыка, калі вялікія палотны экспануюцца ў іншых гарадах і краінах, адпрацавана даўно, і яе прытрымліваюцца многія вялікія расійскія музеі. «У нас цудоўныя калекцыі, і мы дзелімся сваімі работамі не толькі з Віцебскам, але і іншымі музеямі Расіі. Людзі павінны бачыць такія творы, не ўсе маюць магчымасць даехаць да Масквы, Санкт-Пецярбурга і ўбачыць іх», — растлумачыла Вольга Галакціёнава.
Шэдэўр Шагала ў Віцебску застанецца да 14 верасня. 
