Вальфовіч: Беларусь робіць усё магчымае, каб канфлікт ва Украіне як мага хутчэй спыніўся
Фота АДКБ 10 лістапада, Масква /Эдуард Півавар . Беларусь прыкладае практычныя намаганні для ўстанаўлення міру ў рэгіёне. Аб гэтым заявіў журналістам дзяржаўны сакратар Савета бяспекі Беларусі Аляксандр Вальфовіч па выніках праведзенага 10 лістапада ў Маскве сумеснага пасяджэння Савета міністраў замежных спраў, Савета міністраў абароны і Камітэта сакратароў саветаў бяспекі АДКБ,
«Беларусь прыкладала і будзе прыкладаць намаганні для таго, каб устанавіўся мір у нашым рэгіёне, каб спыніўся канфлікт паміж Расіяй і Украінай як мага хутчэй. Мы за гэта выступаем, мы аб гэтым гаворым, гаворыць наш Прэзідэнт. І не проста гаворым, мы робім практычныя захады для гэтага і робім усё магчымае», — сказаў Аляксандр Вальфовіч.
Ён выказаў надзею, што перагаворы, якія праходзяць цяпер у Абу-Дабі, прынясуць станоўчую дынаміку.
Гаворачы аб выніках пасяджэння, дзяржсакратар расказаў, што яго ўдзельнікі далі ацэнку сітуацыі, якая складваецца ў зоне адказнасці АДКБ. «Што датычыцца ўнутранага, скажам так, парадку дня арганізацыі — перш за ўсё гэта ўдасканаленне структуры Аб’яднанага штаба АДКБ, сістэмы калектыўнага аператыўнага рэагавання. Аб гэтым гаварылася, і шэраг дакументаў сёння прыняты, накіраваных на паляпшэнне якасці калектыўных сіл аператыўнага рэагавання», — адзначыў ён.
«Сёння ўзгоднены пакет дакументаў, які заўтра будзе вынесены на зацвярджэнне кіраўнікоў дзяржаў», — дадаў Аляксандр Вальфовіч.
