«Спорт для ўсіх». Самы маштабны летні праект стартуе 5 чэрвеня
Фота sportclub.by 1 чэрвеня, Мінск . Другі сезон маштабнага праекта «Спорт для ўсіх» адкрыецца 5 чэрвеня ў Мінску, паведамілі БЕЛТА ў Прэзідэнцкім спартыўным клубе.
Афіцыйны старт праекта адбудзецца на пляцоўцы каля Нацыянальнай бібліятэкі ў 18.00. Гэта будзе цудоўнае свята драйва ў пачатку другога сезона: цэлы марафон самых любімых і энергічных трэніровак да захаду сонца. Госці змогуць паспрабаваць джампінг, «скокнуўшы вышэй за неба» пад DJ-сэт, пакруціць педалі на занятку па сайклінгу, у агульным парыве станцаваць лаціну і адарвацца на трэніроўцы Stick Rock пад легендарныя рок-хіты ў выкананні кавер-бэнда. Не абыдзецца і без сюрпрызаў: арганізатары праекта прэзентуюць галоўны прыз, які будзе разыграны сярод самых актыўных удзельнікаў па выніках сезона. Што гэта — стане вядома зусім хутка.
Каб стаць часткай яскравага пачатку праекта «Спорт для ўсіх», новым удзельнікам трэба зарэгістравацца на сайце на трэніроўкі фестывалю адкрыцця, а ранейшым — абнавіць свае даныя ў асабістым кабінеце.
У сезоне 2026 года будзе яшчэ больш спорту — каля 40 напрамкаў: ад ёгі, бегу, шахмат да bosu-трэнінгу, сайклінгу, power body. З навінак — выключна жаночыя трэніроўкі. Шэсць пляцовак размешчаны ў розных частках Мінска: у парку імя 50-годдзя Вялікага Кастрычніка на вуліцы Даўгабродскай, парку Цівалі або парку Паўлава, у яблыневым скверы на вуліцы Каліноўскага, пляжы нумар 3 Цнянскага вадасховішча і каля Палаца спорту. Усе трэніроўкі бясплатныя і будуць праходзіць аж да канца верасня, кожны занятак — з прафесійнымі трэнерамі і магутнай порцыяй энергіі і натхнення.
На 7 чэрвеня ў парку імя 50-годдзя Вялікага Кастрычніка арганізатары праекта пры падтрымцы партнёраў запланавалі «Сямейны забег з Prizma». Запісацца можна таксама на сайце праекта. Кожны ўдзельнік атрымае памятны медаль, пераможцаў і прызёраў чакаюць падарункі, а ўсіх гасцей — актыўнасці праекта «Спорт для ўсіх».
Праект «Спорт для ўсіх» Прэзідэнцкага спартыўнага клуба ўжо другі год рэалізуецца пры падтрымцы Мінскага гарвыканкама і аб’яднаў тых, хто любіць рух і адкрыты новаму, хто цэніць сяброўства і стасункі, хто інвесціруе ў здароўе. У 2025 годзе прайшло каля 3 тыс. трэніровак, у якіх прынялі ўдзел каля 20 тыс. чалавек.
