«Сямейны капітал» і розныя льготы. Як у Беларусі падтрымліваюць сем’і з дзецьмі
Фота з архіва 14 ліпеня, Мінск . Як у Беларусі падтрымліваюць сем’і з дзецьмі, расказалі ў Міністэрстве працы і сацыяльнай абароны.
«Беларусь застаецца адной з нямногіх краін, дзе аплатны водпуск па доглядзе дзіцяці можна выкарыстоўваць да дасягнення дзіцем трох гадоў. З мая 2026 аднаразовая выплата пры нараджэнні першага дзіцяці складае — 5096,20 руб., за другога і наступных — 7134,68 руб. Калі жанчына становіцца на медыцынскі ўлік да 12-тыднёвага тэрміну цяжарнасці, ёй выплачваецца аднаразовая дапамога — 100 працэнтаў БПМ (509,62 руб. па 31 ліпеня)», — адзначылі ў ведамстве.
Акрамя таго, адзін з бацькоў атрымлівае штомесячную дапамогу па доглядзе дзіцяці, нават калі працуе. На першае дзіця — 1000,86 руб., на другое і наступных — 1143,84 руб. Пры выхадзе на няпоўны рабочы дзень (0,5 стаўкі або на работу дома) да дасягнення дзіцем 3 гадоў дапамога па доглядзе захоўваецца ў поўным аб’ёме. Пры поўнай занятасці дапамога выплачваецца ў памеры 50 працэнтаў. Разам з дапамогай па доглядзе дзіцяці да 3 гадоў выплачваецца дапамога на старэйшых дзяцей (50 працэнтаў БПМ на сям’ю — 254,81 руб.) усе тры гады.
Шматдзетнай сям’я лічыцца ўжо з трыма дзецьмі да 18 гадоў. Пасля нараджэння трэцяга дзіцяці сям’я афіцыйна атрымлівае статус шматдзетнай, а разам з ім — дадатковыя жыллёвыя, падатковыя і сацыяльныя льготы. Калі ў сям’і нараджаецца або ўсынаўляецца трэцяе або наступнае дзіця, дзяржава залічвае на спецыяльны рахунак — «Сямейны капітал», які складае 35 505 руб. Грошы можна накіраваць у безнаяўным парадку на жыллё, адукацыю, медыцыну, набыццё сродкаў рэабілітацыі. Таксама шматдзетныя сем’і могуць прэтэндаваць на дзяржпадтрымку пры будаўніцтве або набыцці жылля: субсідыі, ільготнае крэдытаванне і дапамога з пагашэннем часткі доўгу.
У ведамстве дадалі, што таксама існуюць асобныя выплаты дзецям-інвалідам і сем’ям з асаблівымі абставінамі. Павышаны памер штомесячнай дапамогі па доглядзе дзіцяці-інваліда да 3 гадоў складае 1286,82 руб., дапамогі на дзяцей старэйшых за 3 гады — 356,73 руб. на дзіця-інваліда, 254,81 руб. — на дзяцей без інваліднасці. Дадатковая дапамога па доглядзе дзіцяці-інваліда да 18 гадоў — 509,62 / 611,54 руб., сацыяльная пенсія на дзіця-інваліда (залежыць ад ступені страты здароўя) — ад 407,70 да 560,58 руб., сацыяльная дапамога на набыццё прадметаў-гігіены для дзяцей-інвалідаў з 4-й ступенню страты здароўя.
«Памер дапамог і сацыяльнай пенсіі рэгулярна індэксуецца. Выплаты прывязаны да бюджэту пражытачнага мінімуму і пераглядаюцца некалькі разоў у год. Напрыклад, у 2026 годзе памеры павышаліся ў лютым і маі. Далей перагляд выплат будзе ў жніўні і лістападзе. Сістэма падтрымкі не замарожана: у 2025 годзе былі прыняты новыя змяненні — павялічаны мінімальныя памеры дапамогі па цяжарнасці і родах, па часовай непрацаздольнасці, па доглядзе дзяцей і ўзмоцнена падтрымка сем’яў, якія выхоўваюць дзяцей-інвалідаў», — рэзюмавалі ў міністэрстве.
