Работа над законапраектам аб ветэрынарнай дзейнасці ўжо дае станоўчы эфект — дэпутат
Фота з архіва 12 ліпеня, Мінск . Работа над законапраектам аб ветэрынарнай дзейнасці ўжо дае станоўчы эфект. Такое меркаванне выказала член Пастаяннай камісіі па аграрнай палітыцы Палаты прадстаўнікоў Алена Пархімчык у эфіры тэлеканала СТБ, .
Цяпер законапраект «Аб ветэрынарнай дзейнасці» знаходзіцца на разглядзе ў Палаце прадстаўнікоў. «Дэпутаты Пастаяннай камісіі па аграрнай палітыцы актыўна працуюць над дакументам, каб з пачаткам асенняй сесіі ў верасні прыняць яго ў першым чытанні. Мы праводзім актыўнае абмеркаванне з прадстаўнікамі Беларускай ветэрынарнай супольнасці, зацікаўленых міністэрстваў і ведамстваў і, зразумела, непасрэдна з тымі, хто будзе прымяняць гэты закон на практыцы. Палата прадстаўнікоў — гэта менавіта тая пляцоўка, дзе неабходна адпрацаваць усе нормы такім чынам, каб захаваць баланс і не ўшчаміць інтарэсы ні правапрымяняльнікаў, ні спажыўцоў ветэрынарных паслуг», — адзначыла Алена Пархімчык.
Дзяржаўнае рэгуляванне ў гэтай сферы будзе, падкрэсліла яна. «У якіх менавіта формах яно будзе рэалізавана — якраз гэтыя моманты мы цяпер і абмяркоўваем. Каб аказанне паслуг не мела хаатычнага характару і каб усе спажыўцы былі задаволены іх якасцю, увядзенне дзяржаўнага рэгулявання проста неабходна. Гэта можа быць рэгістрацыя, унясенне ў рэестр або іншыя формы. Цяпер мы якраз шукаем аптымальны баланс, каб не парушыць нічые інтарэсы», — звярнула ўвагу дэпутат.
Нельга сказаць, што і на гэты момант гэта сфера знаходзіцца абсалютна без увагі з боку дзяржавы, лічыць Алена Пархімчык. «Закон аб ветэрынарнай дзейнасці ўжо дзейнічае, існуюць ветэрынарна-санітарныя правілы, якія прад’яўляюць пэўныя патрабаванні як да памяшканняў, так і да самога працэсу аказання паслуг», — сказала яна.
На яе думку, гэта тэма цяпер актыўна абмяркоўваецца і сярод ветэрынараў, і сярод уладальнікаў гадаванцаў. «Магчыма, з улікам таго, што плануецца ўвядзенне новых норм, спецыялісты сталі больш дысцыплінаванымі, больш звяртаюць увагі на ўмовы, у якіх яны працуюць і прымаюць сваіх пацыентаў. Таму работа над законапраектам у любым выпадку ўжо дае станоўчы эфект, — заўважыла дэпутат. — Прыватнікі вельмі актыўныя ў абмеркаваннях, таму што гэта закранае ў першую чаргу іх інтарэсы. Але ў прававой дзяржаве ўсе павінны працаваць у адпаведнасці з законамі. І ад таго, якія нормы ў выніку зафіксуе законапраект аб ветэрынарнай дзейнасці, будзе залежаць і развіццё іх бізнесу, і якасць паслуг, што аказваюцца насельніцтву».
Скрыншот відэа тэлеканала СТБ
