Малашка: інфармсістэма «турызм» будзе змяшчаць усю інфармацыю аб суб’ектах туріндустрыі, відах і кошце паслуг
Валерый Малашка 3 чэрвеня, Мінск . Дзяржаўная інфармацыйная сістэма «турызм», увядзенне ў дзеянне якой прадугледжана праектам закона «Аб змяненні законаў па пытаннях фізічнай культуры, спорту і турызму», будзе фарміравацца з розных крыніц, у тым ліку судоў, АДР. Аб гэтым паведаміў старшыня Пастаяннай камісіі па ахове здароўя, фізічнай культуры, сямейнай і маладзёжнай палітыцы Палаты прадстаўнікоў Валерый Малашка, прадстаўляючы законапраект дэпутатам,
У інфармацыйнай сістэме будзе змяшчацца ўвесь спектр інфармацыі аб суб’ектах турыстычнай індустрыі, відах і кошце аказаных імі паслуг. «Можна сказаць, што законапраектам прапануецца данастроіць механізм падтрымання інфармацыі аб суб’ектах турыстычнай дзейнасці ў самым актуальным стане. Фарміравацца яна будзе з розных крыніц, у тым ліку з судоў, Адзінага дзяржаўнага рэгістра (Адзінага дзяржаўнага рэгістра юрыдычных асоб і індывідуальных прадпрымальнікаў. — Заўвага БЕЛТА) і інш.», — сказаў Валерый Малашка.
Вядзенне такой інфармацыйнай сістэмы, паводле яго слоў, — важкая гарантыя атрымання поўнай і дакладнай інфармацыі, якая датычыцца ўсіх аспектаў аказання турыстычных паслуг. Яна гарантуе кожнаму спажыўцу магчымасць зрабіць правільны выбар.
Навелай праекта з’яўляецца таксама ўзмацненне ролі Міжведамаснага экспертна-каардынацыйнага савета па турызме пры Савеце Міністраў. Як мяркуецца, рашэнні савета, прынятыя па пытанні каардынацыі будаўніцтва аб’ектаў турыстычнай індустрыі, будуць мець абавязковы характар для ўсіх дзяржаўных органаў, грамадскіх і іншых арганізацый, адзначаных у такіх рашэннях. Тым самым будуць забяспечаны аптымізацыя працэсу ўзвядзення аб’ектаў туріндустрыі, скарачэнне тэрмінаў будаўніцтва і належны кантроль за якасцю ствараемых аб’ектаў, што, несумненна, таксама павінна даць станоўчы эфект для развіцця галіны.
Праект закона «Аб змяненні законаў па пытаннях фізічнай культуры, спорту і турызму» прыняты 3 чэрвеня ў другім чытанні.
Фота Віталя Піваварчыка
