Мінсувязі і ПВТ аб’ядналі намаганні для пашырэння лічбавых рашэнняў
Фота з архіва 6 кастрычніка, Мінск . Абноўлены асабісты кабінет рэзідэнта на сайце ПВТ інтэграваны з ГІС «Вітрына лічбавых праектаў». Аб гэтым паведамілі ў прэс-службе Мінсувязі.
Цяпер кампаніі могуць актуалізаваць свае даныя, не пераключаючыся паміж экраннымі формамі.
Як адзначылі ў Мінсувязі, анкета, якую запаўняе ІТ-кампанія, — не фармальны пералік прадуктаў, а паўнацэнны лічбавы профіль кампаніі. У ім адлюстроўваецца экспертыза і набор тэхналогій, рэалізаваныя праекты, прафесійныя дасягненні і ўзнагароды.
Карысць інтэграцыі ў тым, што кампетэнцыі цяпер бачны тым, хто выкарыстоўвае «Вітрыну лічбавых праектаў» для падбору патэнцыяльных выканаўцаў для сваіх праектаў. Таксама ў ліку пераваг — хуткасць і зручнасць. Усе дзеянні выконваюцца ўнутры адзінага інтэрфейсу асабістага кабінета на сайце ПВТ.
«Такое новаўвядзенне — яшчэ адзін канал інфармавання аб сваіх магчымасцях для ІТ-кампаній і спосаб бясшвовага інфармацыйнага насычэння базы тэхналагічных кампетэнцый для тых, хто шукае партнёраў для рэалізацыі лічбавых праектаў», — адзначылі ў прэс-службе.
