Мінэканомікі: у Беларусі створаны спрыяльныя ўмовы для рэалізацыі інвестарамі перспектыўных праектаў
Алеся Абраменка 22 мая, Мінск . У Беларусі створаны спрыяльныя ўмовы для рэалізацыі інвестарамі перспектыўных праектаў. Аб гэтым заявіла намеснік міністра эканомікі Алеся Абраменка ў ходзе пленарнага пасяджэння Гомельскага эканамічнага форуму, паведамілі ў прэс-службе Мінэканомікі.
Намеснік кіраўніка міністэрства нагадала аб новых інструментах інвестыцыйнага заканадаўства, накіраваных на стымуляванне рэалізацыі інвестпраектаў у краіне: інвестыцыйны дагавор, спецінвестыцыйны дагавор, прэферэнцыйны інвестыцыйны праект, а таксама бюджэтныя трансферты на пакрыццё капітальных затрат у сувязі з паспяховай рэалізацыяй інвестпраектаў.
Алеся Абраменка адзначыла, што пры ўдасканаленні інвестыцыйнага заканадаўства ўлічваліся як унутраныя задачы развіцця, так і вопыт краін-партнёраў. «У прыватнасці, пры ўкараненні спецыяльных інвестыцыйных дагавораў мы абапіраліся на падобныя расійскія механізмы спецінвесткантрактаў і афсетных кантрактаў у дзяржзакупках», — растлумачыла яна.
Намеснік міністра эканомікі падкрэсліла, што работа па абароне правоў і гарантый інвестараў ідзе не толькі на нацыянальным узроўні, але і ў рамках міжнародных аб’яднанняў з удзелам нашай краіны. «Дагавор аб Еўразійскім эканамічным саюзе змяшчае палажэнні, накіраваныя на забеспячэнне аднолькавых умоў і гарантый для інвестараў. У рамках Саюзнай дзяржавы практычна на пастаяннай аснове сумесна з Міністэрствам эканамічнага развіцця Расійскай Федэрацыі рэалізуюцца практычныя мерапрыемствы, якія павінны садзейнічаць узаемным інвестыцыям», — адзначыла Алеся Абраменка.
Яна таксама расказала аб першых выніках прымянення інструментаў абноўленага інвестыцыйнага заканадаўства ў краіне. «Заключаны тры буйнейшыя інвестдагаворы на 2,6 млрд рублёў. Адобраны 36 прэферэнцыйных праектаў з агульным аб’ёмам інвестыцый амаль 2 млрд рублёў. Гомельская вобласць пакуль тут прадстаўлена не актыўна, толькі адзін прэфпраект. Разлічваем, што сённяшні форум надасць імпульс рэалізацыі большай колькасці інвестпраектаў на гасціннай Гомельшчыне», — рэзюмавала Алеся Абраменка.
Намеснік міністра эканомікі таксама наведала СЭЗ «Гомель-Ратон» і Гомельскі тэрытарыяльны аддзел па санацыі і банкруцтве. З кіраўніцтвам адміністрацыі абмяркоўваліся вынікі работы і перспектыўныя планы развіцця, а з калегамі разглядаліся пытанні аказання метадалагічнай дапамогі выканкамам у папярэджанні неплацежаздольнасці.
