Міжнародны форум «Штучны інтэлект у Беларусі» праходзіць у Мінску
13 кастрычніка, Мінск . Міжнародны форум IT-Акадэмграда «Штучны інтэлект у Беларусі», прымеркаваны да 98-годдзя Нацыянальнай акадэміі навук, праходзіць у Мінску. На яго пляцоўцы разгарнулася выстаўка айчынных распрацовак у галіне ШІ і робататэхнікі,
Форум аб’яднаў вядучых вучоных, інжынераў, прадстаўнікоў бізнесу, дзяржавы і адукацыі, каб абмеркаваць ключавыя тэндэнцыі і перспектывы развіцця тэхналогій штучнага інтэлекту. Гэта пляцоўка для прэзентацыі айчынных распрацовак, абмену вопытам і пошуку новых партнёраў у сферы ШІ і робататэхнікі.
На выстаўцы прадстаўлены рашэнні ў сферах аховы здароўя, адукацыі, прамысловасці, энергетыкі, экалогіі і кібербяспекі. Разнастайнасць праектаў дае магчымасць убачыць, наколькі шырока тэхналогіі ШІ прымяняюцца для вырашэння практычных задач.
Аб’яднаны інстытут праблем інфарматыкі НАН Беларусі прадстаўляе распрацоўкі, якія дэманструюць практычнае прымяненне штучнага інтэлекту ў навуцы, медыцыне і штодзённым жыцці: тэхналогіі ШІ для ранніх стадый распрацоўкі лекавых сродкаў, лічбавы двайнік гуманоіднага робата, нейрасеткавыя рашэнні для выяўлення і суправаджэння аб’ектаў з дапамогай дронаў, суперкамп’ютарнае мадэляванне і апрацоўка даных дыстанцыйнага зандзіравання Зямлі на базе тэхналогіі «Куб даных» (Data Cube). Медыцынскі напрамак уключае абноўлены нейрасеткавы комплекс LungExpert для падтрымкі дыягностыкі захворванняў лёгкіх, распрацоўкі па бяспецы ШІ ў медыцынскай дыягностыцы і сістэму падтрымкі прыняцця рашэнняў для выбару тактыкі ў клінічнай трансфузіялогіі. Таксама наведвальнікі могуць убачыць карпаратыўнага ШІ-памочніка Chat UIIP і распрацоўкі для штодзённых задач — аўдыягіды і навігатары.
Калектыўны стэнд Міністэрства адукацыі дэманструе распрацоўкі беларускіх ВНУ. Так, БДУІР паказвае інтэлектуальнага памочніка для студэнтаў, сістэму персаніфікаванай тэрапіі дыхальнай недастатковасці, праграмна-апаратныя комплексы для забеспячэння электрамагнітнай сумяшчальнасці і стэнд для праграмавання ўбудаваных сістэм. БДУ — «5D-Архіў Беларусі» з тэхналогіяй запісу і счытвання інфармацыі ў шкле, сістэму транскрыбацыі і перакладу з рускай мовы на кітайскую, інавацыйны рэдактар партрэтаў і AI-сэрвіс для ацэнкі і падбору нерухомай маёмасці. БНТУ — праграмна-апаратны комплекс аўтаматычнай аптычнай інспекцыі друкарскіх плат на аснове ШІ, камеру Вільсана з інтэлектуальным аналізам трэкаў часціц і сістэму дыягностыкі меланомы. Брэсцкі дзяржаўны тэхнічны ўніверсітэт — робата-афіцыянта і робата-сабаку. Гомельскі дзяржаўны тэхнічны ўніверсітэт імя П.В.Сухога — сістэму генерацыі навучальных матэрыялаў на аснове вялікіх моўных мадэлей. Гродзенскі дзяржаўны ўніверсітэт імя Янкі Купалы — нейрасеткавыя рашэнні для дыягностыкі інсульту і захворванняў печані, а таксама сучасныя навучальныя модулі ў галіне ШІ і інтэлектуальных тэхналогій. БДТУ прэзентуе інтэлектуальны лічбавы модуль для ацэнкі жыццёвага цыкла ападкаў ачышчальных збудаванняў з прымяненнем машыннага навучання, лічбавага двайніка і шматкрытэрыяльнай аптымізацыі.
Дзелавая праграма ўключае ў сябе пленарнае пасяджэнне і канферэнцыю «Практычныя тэхналогіі штучнага інтэлекту». Сёння таксама адбудзецца цырымонія ўзнагароджання пераможцаў конкурсу «Лідары штучнага інтэлекту Беларусі — 2026» у трох намінацыях: «Кампанія — лідар ШІ», «Праект — лідар ШІ», «Прадукт — лідар ШІ». Перамога ў конкурсе з’яўляецца прызнаннем укладу ўдзельнікаў у развіццё нацыянальных тэхналогій штучнага інтэлекту і адкрывае новыя магчымасці для супрацоўніцтва і пашырэння інавацый. У другі дзень форуму, 14 кастрычніка, запланавана выстаўка праектаў беларускіх школьнікаў, якія працуюць з тэхналогіямі ШІ. 
Фота Андрэя Сіняўскага
