Міжнародная экспедыцыя «Дарога да святынь» стартавала ў Мінску
2 верасня, Мінск . XXXIII Міжнародная навукова-асветная экспедыцыя «Дарога да святынь» стартавала ў Мінску,
Перад стартам маршруту прайшоў малебен у Святадухаўскім кафедральным саборы з удзелам Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі. Ён падкрэсліў высокую значнасць і шматгадовую пераемнасць праекта. «За гады існавання экспедыцыі пройдзена нямала маршрутаў і сказана шмат слоў для распаўсюджвання асветных ідэй і аднаўлення гісторыі Айчыны. Праект аб’ядноўвае вучоных, прапаведнікаў і ўсіх, хто натхнёны сваёй справай», — сказаў мітрапаліт Веніямін.
Паводле яго слоў, хоць з моманту правядзення першай экспедыцыі яе сутнасць не змянілася, сам працэс асветы стаў больш складаным. «Працэс адраджэння прадаўжаецца. Але трэба гаварыць ужо сучаснаму чалавеку актуальнай мовай аб тых ісцінах і рэаліях нашай духоўнай спадчыны, якія яшчэ невядомы і разам з тым якія карысна ведаць і ўлічваць цяперашняму беларусу», — адзначыў ён.
Намеснік міністра інфармацыі Дзяніс Езерскі паведаміў, што старт экспедыцыі афіцыйна адкрывае мерапрыемствы да Дня беларускага пісьменства, святкаванне якога ў гэтым годзе пройдзе ў Касцюковічах.
«Кожны раз з малітвы і добрага слова Уладыкі мы пачынаем важнае, светлае мерапрыемства, якое ўмацоўвае не толькі маральнасць і духоўнасць, але і нашу гістарычную памяць. Тое, што ўдзельнікі экспедыцыі ідуць па гарадах з добрым словам, сустракаюцца з моладдзю, нясуць гісторыю і гавораць аб чыстым і светлым, — гэта цудоўна. Праважаючы вас сёння, мы ведаем, што сустрэнемся ўжо хутка — у Касцюковічах», — сказаў Дзяніс Езерскі.
На асаблівую атмасферу маючага адбыцца шляху і важнасць захавання духоўнай спадчыны звярнуў увагу намеснік Упаўнаважанага па справах рэлігій і нацыянальнасцей Сяргей Герасіменя. Паводле яго слоў, святасць будзе суправаджаць удзельнікаў не толькі ў саборах і цэрквах, але і каля помнікаў абаронцам Айчыны. 
«Святасць — па ўсёй гэтай дарозе, па благаслаўлёнай беларускай зямлі. Дзяржава сёння прадастаўляе ўсе магчымасці для таго, каб абараняць перш за ўсё духоўнасць сваёй зямлі», — падкрэсліў Сяргей Герасіменя.
Удзельнікам «Дарогі да святынь» трэба пераадолець каля 1,2 тыс. км па тэрыторыі Мінскай, Пінскай, Барысаўскай і Магілёўскай епархій. Калона пройдзе па маршруце Мінск — Святое Поле каля вёскі Загор’е Баранавіцкага раёна — Беразіно — Клічаў — Бабруйск — Магілёў — Горкі — Мсціслаў — Касцюковічы. 
Як расказаў кіраўнік навукова-асветнай экспедыцыі Аляксандр Лапата-Загорскі, за ўсе гады ў ёй прынялі ўдзел больш як 420 чалавек, а ў спіс гэтага года ўвайшлі 30 удзельнікаў, хоць сваю прысутнасць пацвердзілі 26 чалавек. Маршрут заўсёды непасрэдна звязаны са сталіцай Дня беларускага пісьменства. Традыцыйным пунктам наведвання застаецца Святое Поле ў Баранавіцкім раёне, а першы дзень шляху пройдзе пад знакам памяці свяшчэннамучаніка Уладзіміра Хіраскі.
На шляху руху ўдзельнікі праводзяць духоўна-асветныя мерапрыемствы, сустракаюцца з прыхаджанамі храмаў і працоўнымі калектывамі, наведваюць мемарыяльныя комплексы і месцы баявой славы, робяць візіты ў сацыяльныя ўстановы. Запланавана правядзенне навуковых канферэнцый, урокаў беларускага пісьменства, сустрэчы са школьнікамі, а таксама пасадка традыцыйных Малітвеных садоў.
Фота Максіма Гучака
