Лукашэнка сустрэўся з членамі ўрада Інданезіі для абмеркавання найважнейшых сумесных інвестпраектаў
1 ліпеня, Джакарта . Прэзідэнт Беларусі Аляксандр Лукашэнка сустрэўся з членамі ўрада Інданезіі для абмеркавання пытанняў рэалізацыі найважнейшых сумесных інвестыцыйных праектаў,
У сустрэчы з інданезійскага боку прынялі ўдзел міністр інвестыцый, кіраўнік Інвестыцыйнага каардынацыйнага савета, гендырэктар Суверэннага фонду дабрабыту Інданезіі «Данантара» Росан Перкаса Руслані, міністр сельскай гаспадаркі, кіраўнік Нацыянальнага агенцтва па харчаванні «Бапанас» Аідзі Амран Сулайман, генеральны дырэктар и прэзідэнт-дырэктар дзяржаўнай нафтагазавай карпарацыі «Петраміна» Сайман Алаізіус Мантыры.
«Паважаныя сябры, думаю, вы ўжо многія пытанні да гэтай сустрэчы абмеркавалі. Тым не менш, магчыма, узніклі нейкія пытанні, якія трэба будзе вырашыць без валакіты. Я да гэтага гатовы. Ведаю, што і ў галіне сельскай гаспадаркі, паставак і сумеснай вытворчасці медыцынскіх, ветэрынарных прэпаратаў, прадуктаў харчавання вы абмяркоўвалі тэмы», — адзначыў у пачатку сустрэчы кіраўнік дзяржавы. 
«Я хачу, каб вы ведалі: калі мы нешта можам для вас зрабіць — калі ласка, мы вас чакаем у Беларусі. Паглядзіце нашы вытворчыя кампаніі, нашы прадпрыемствы. Калі вас нешта зацікавіць, лічыце, што гэта ўсё рэалізуемае. У нас закрытых тэм у супрацоўніцтве з Інданезіяй няма. Наадварот, мы хочам пашыраць наша супрацоўніцтва. Таму давайце будзем дамаўляцца, — заявіў беларускі лідар. — Калі вы захочаце інвесціраваць у нейкія прадпрыемствы, мы разгледзім любыя вашы прапановы. Узаемна хацелі б, каб без усялякай валакіты і затрымак (вырашаліся пытанні. — Заўвага ), калі мы будзем ствараць тут прадпрыемствы па сумеснай вытворчасці тавараў, якія вас цікавяць. Магчымы любыя напрамкі супрацоўніцтва. Вы толькі гаварыце, што трэба. Яшчэ раз падкрэсліваю, каб вызначыцца з нашымі магчымасцямі, вы паглядзіце ў Беларусі, на што здольна краіна». 
«Вы добра ведаеце, што нашы магчымасці — гэта перш за ўсё беларускія тэхналогіі, якія каранямі адыходзяць у часы Савецкага Саюза. Таксама ведаеце, што гэта была адна з самых развітых краін свету. Мы гэтыя тэхналогіі захавалі і шмат у чым мадэрнізавалі прадпрыемствы, якія працуюць па гэтых тэхналогіях. І самае галоўнае, я ведаю мэты, да якіх вы імкняцеся. На шляху да гэтых мэт мы можам быць вам карысны з нашымі тэхналогіямі», — дадаў Аляксандр Лукашэнка.
У сваю чаргу міністр інвестыцый Росан Перкаса Руслані адзначыў, што Прэзідэнт Інданезіі Прабова Субіянта даў указанні ўмацоўваць і развіваць адносіны з Беларуссю ва ўсіх магчымых сферах. 
