Лукашэнка накіраваў спачуванне ў сувязі са смерцю дзяржаўнага дзеяча Беларусі Аляксандра Якабсона
Аляксандр Якабсон. Фота з архіва sn.by 28 верасня, Мінск . Кіраўнік дзяржавы Аляксандр Лукашэнка накіраваў спачуванне родным і блізкім дзяржаўнага дзеяча Беларусі Аляксандра Якабсона. Аб гэтым паведамілі ў прэс-службе беларускага лідара.
«Прыміце спачуванні ў сувязі са смерцю вядомага дзяржаўнага дзеяча Рэспублікі Беларусь, увесь жыццёвы шлях якога — яскравы прыклад служэння народу і Айчыне», — гаворыцца ў спачуванні.
«Пайшоў з жыцця чалавек выдатных прафесійных якасцей, духоўных і маральных прынцыпаў, што пацвярджаюць шматлікія дзяржаўныя ўзнагароды, — адзначыў Прэзідэнт. — Будаўнік па адукацыі і па прызванні, ён прайшоў суровую школу жыцця, атрымаўшы стальную савецкую загартоўку. Заўсёды быў патрабавальным і дасведчаным кіраўніком, фундаментальна выбудоўваў вытворчыя і кіраўніцкія працэсы, абапіраючыся ў сваёй рабоце на закон, справядлівасць і дысцыпліну. Яго ўклад у станаўленне суверэннай Беларусі, забеспячэнне яе нацыянальнай бяспекі немагчыма пераацаніць».
Аляксандр Лукашэнка падкрэсліў, што пры гэтым Аляксандр Якабсон заставаўся простым і сціплым чалавекам. «Светлая памяць аб ім заўсёды будзе жыць у нашых сэрцах», — адзначыў кіраўнік дзяржавы.
Аляксандр Серафімавіч Якабсон працаваў на розных дзяржаўных пасадах. У тым ліку быў старшынёй Гомельскага абласнога выканаўчага камітэта, старшынёй Камітэта дзяржаўнага кантролю, памочнікам Прэзідэнта Рэспублікі Беларусь — галоўным інспектарам па г.Мінску.
