Людзі скардзяцца на шум. Якія абмежаванні і чаму прапануецца ўвесці пры здачы дачных домікаў?
10 чэрвеня, Мінск . Якія абмежаванні і чаму прапануецца ўвесці пры здачы дачных домікаў, пракаменціравалі ў Міністэрстве эканомікі.
На грамадскае абмеркаванне вынесены праект указа «Аб удасканаленні дзейнасці садаводчых таварыстваў». Праект падрыхтаваны па даручэнні ўрада з улікам прапаноў, што паступілі з Савета Рэспублікі, Палаты прадстаўнікоў, зваротаў таварыстваў і асобных садаводаў. «Адна з такіх прапаноў — увесці абмежаванні на прадастаўленне паслуг па правядзенні культурна-відовішчных мерапрыемстваў, паслуг лазні (саўны) на тэрыторыі таварыстваў. Падстава — шматлікія скаргі грамадзян на праблемы, якія ствараюцца такім выкарыстаннем. Названыя абмежаванні прапануюцца выключна ў адносінах да выпадкаў здачы ўладальнікамі ўчасткаў і домікаў для кароткатэрміновага пражывання», — расказалі ў Мінэканомікі.
Ключавой умовай прапанаваных абмежаванняў з’яўляецца тое, што пры здачы садовых домікаў для кароткатэрміновага пражывання ў іх і на зямельных участках, прадастаўленых для калектыўнага садаводства, нельга будзе адначасова атрымліваць паслугі па арганізацыі адпачынку, правядзенні свят, вяселляў і іншых культурна-масавых мерапрыемстваў. Не прадугледжваецца ўвядзенне якіх-небудзь забарон для членаў таварыства і іх сем’яў, якія выкарыстоўваюць садовыя домікі для вядзення садаводства або іншага адпачынку.
Пры гэтым у Міністэрстве эканомікі адзначылі, што можна будзе і ў далейшым здаваць садовыя домікі і дачы для кароткатэрміновага пражывання, абмежаванняў на гэта няма.
Акрамя таго, на абмеркаванне вынесена пытанне змяншэння кворуму для прыняцця агульным сходам рашэння аб далучэнні таварыства да населенага пункта альбо стварэнні на базе таварыства населенага пункта. Цяпер рашэнне можа быць прынята пры ўмове аднагалоснага адабрэння ўсімі членамі таварыства. Прапануецца ўстанавіць кворум у дзве трэці ад агульнай колькасці членаў таварыства.
Свае заўвагі і прапановы па праекце дакумента можна выказаць на Прававым форуме Беларусі. Па выніках абмеркавання праекта дакумента будуць унесены неабходныя карэкціроўкі.
