Кааперацыйныя праекты, сельская гаспадарка, турызм. Беларусь і Арлоўская вобласць умацоўваюць супрацоўніцтва
21 ліпеня, Брэст . У Брэсце праходзіць трэцяе пасяджэнне рабочай групы па ўзаемадзеянні Беларусі і Арлоўскай вобласці Расіі,
Бакі падтрымліваюць гандлёва-эканамічнае супрацоўніцтва, узаемадзейнічаюць у прамысловасці, сельскай гаспадарцы, у сферах адукацыі, культуры і іншых.
«За пяцігодку ўзаемны тавараабарот Беларусі і Арлоўскай вобласці павялічыўся ў 2,8 раза. На сённяшні момант таксама адзначаецца рост. У нас ёсць кааперацыйныя праекты, у тым ліку ў прамысловай вытворчасці. У Арлоўскай вобласці выдатны мэблевы кластар, з якім мы будзем працаваць. Таксама — па прадукцыі для перапрацоўчай прамысловасці. У нас ёсць шмат узаемадапаўняльных тэм як з боку Брэсцкай вобласці, так і ў цэлым з боку Беларусі», — сказаў намеснік старшыні Брэсцкага аблвыканкама Міхаіл Бацэнка. У прыватнасці, размова ідзе аб пастаўках тэхнікі беларускай вытворчасці, якая зарэкамендавала сябе ў Арлоўскай вобласці.
«Думаю, сёння знойдзем рэзервы, якія павінны абавязкова адпрацаваць. Для гэтага ў нас і створана рабочая група: шчыра абмяркоўваць усе пытанні, не толькі поспехі, але і моманты, дзе можам яшчэ падцягнуцца», — падкрэсліў Міхаіл Бацэнка.
Губернатар Арлоўскай вобласці Андрэй Клычкоў акцэнтаваў увагу на добрай дынаміцы адносін, рэалізацыі сумесных праектаў. Напрыклад, у Арле адкрыўся мультыбрэндавы цэнтр беларускай тэхнікі. «Выкананы ўсе задачы, якія былі пастаўлены. Але, мне здаецца, агульная эканамічная сітуацыя патрабуе больш дэталёвага вывучэння бягучых магчымасцей. Мы бачым вялікі патэнцыял, таму што на гэты момант у нас актыўна расце экспарт прадукцыі з Арлоўскай вобласці ў Беларусь. Ёсць тэндэнцыя і да росту імпарту. Вялікае поле для развіцця супрацоўніцтва», — перакананы Андрэй Клычкоў.
Наладжана ўзаемадзеянне дзелавых колаў, адзначыў ён. Плённа супрацоўнічаюць бакі па селекцыі, сортавыпрабаванні і першасным насенняводстве зернебабовых, крупяных і іншых культур з прымяненнем сучасных тэхналогій. Вялікі патэнцыял для развіцця супрацоўніцтва ў сферы адукацыі, культуры.
Запланавана наведванне гасцямі прадпрыемстваў і турыстычных аб’ектаў. «Мы ўдзяляем увагу не толькі эканоміцы (экспарту і імпарту), сельскай гаспадарцы, прамысловасці. Адна з тэм — турызм», — дадаў намеснік старшыні Брэсцкага аблвыканкама.
Другое пасяджэнне рабочай групы адбылося ў жніўні 2025 года ў Арле.
