IT-сфера і транспарт выступілі асноўнымі драйверамі росту эканомікі Беларусі ў студзені-маі
Фота з архіва 19 чэрвеня, Мінск . Інфармацыя і сувязь, транспарт, сельская гаспадарка і гандаль выступілі асноўнымі драйверамі росту беларускай эканомікі ў студзені — маі 2026 года. Аб гэтым паведамілі ў прэс-службе Міністэрства эканомікі.
Як раней паведаміў Нацыянальны статыстычны камітэт, у студзені — маі гэтага года тэмп росту ВУП склаў 100,9 працэнта — гэта на 0,7 працэнтнага пункта больш, чым месяцам раней. У «чыстых» месяцах (месяц да аналагічнага месяца мінулага года) тэмп росту ВУП паскараецца трэці месяц запар і ў маі ўжо перавысіў 103 працэнты.
Асноўнымі драйверамі эканомікі ў студзені — маі застаюцца інфармацыя і сувязь (тэмп росту 105,5 працэнта), транспарт (104,3 працэнта), сельская гаспадарка (103,9 працэнта) і гандаль (102,2 працэнта). Дынаміка ў IT-сферы звязана з ростам колькасці работнікаў. У транспартнай сферы ўстойлівы рост дэманструе пасажыраабарот — плюс 7,8 працэнта, грузаабарот таксама павялічыўся (на 1,1 працэнта). Пазіцыі ў сельскай гаспадарцы забяспечаны прыбаўкай у вытворчасці малака, мяса птушкі, свіней і буйной рагатай жывёлы. Расце і прадукцыйнасць жывёл.
Тэмп прамвытворчасці склаў 98,6 працэнта, дадаўшы ў адносінах да студзеня — красавіка на 1,1 працэнтнага пункта. У «чыстых» месяцах дынаміка паляпшаецца, прамвытворчасць прырастае другі месяц запар, у «чыстым» маі тэмп 103 працэнта. Шэраг галін, такіх як фармацэўтыка, харчовая і хімічная прамысловасць, вытворчасць транспартных сродкаў, дэманструе ўстойлівы рост.
Рознічны тавараабарот за студзень — май павялічыўся на 7,1 працэнта. Па выніках студзеня — мая 2026 года ўпэўнена дадаюць інвестыцыі ў асноўны капітал: тэмп росту 101,5 працэнта. Прадпрыемствы прадаўжаюць укладваць у тэхналагічнае абнаўленне: выдаткі на набыццё машын і абсталявання выраслі на 6 працэнтаў.
Экспарт тавараў і паслуг у студзені — красавіку 2026 года (па метадалогіі плацежнага балансу) на 15,4 працэнта вышэйшы за ўзровень першых чатырох месяцаў 2025-га. Экспарт тавараў перавысіў узровень аналагічнага перыяду мінулага года на 11,9 працэнта. Умацоўваецца супрацоўніцтва з краінамі далёкай дугі. Дынамічна расце экспарт у краіны Лацінскай Амерыкі і Карыбскага басейна — на 31,6 працэнта, Азіі — на 43,1 працэнта.
Актыўна нарошчваецца экспарт паслуг: у студзені — красавіку 2026 года — на 28 працэнтаў. Асноўныя драйверы — транспарт, будаўніцтва і ІКТ-паслугі.
Прадаўжае запавольвацца гадавая інфляцыя: у маі яна склала 4,8 працэнта.
Устойлівая работа эканомікі дала магчымасць забяспечыць высокі ўзровень зарплаты — больш як 2850 рублёў у студзені — красавіку 2026 года. Сярэдні памер пенсіі па ўзросце перавысіў 1049 рублёў.
