Гродзенскі «Рытм» 26-ы раз выйграў жаночы Кубак Беларусі па хакеі на траве
Фота з архіва 3 ліпеня, Мінск . На стадыёне ў сталічным парку Горкага завяршыўся розыгрыш Кубка Беларусі па хакеі на траве сярод жаночых каманд 2026 года,
Другі па значнасці ўнутраны трафей заваяваў гродзенскі «Рытм». Дзяўчыны з захаду краіны абыгралі ХК «Мінск» і смалявіцкую «Вікторыю» з аднолькавым лікам 2:1, а таксама ўступілі «Тэкстыльшчыку» з Баранавіч (1:4). «Рытм» і «Вікторыя» набралі па шэсць ачкоў, але гродзенкі занялі першае месца дзякуючы перамозе ў асабістай сустрэчы.
«Рытм» выйграў Кубак Беларусі 26-ы раз у гісторыі і чацвёрты раз за апошнія шэсць гадоў. У мінулым чэмпіянаце краіны гродзенскі клуб стаў бронзавым прызёрам. Раней перамогу ў розыгрышы Кубка Беларусі сярод мужчынскіх каманд атрымаў ХК «Мінск».
Чэмпіёнамі краіны па хакеі на траве ў сезоне-2025/26 сталі брэсцкі «Будаўнік» (мужчыны) і ХК «Мінск» (жанчыны).
