УС РФ праводзяць вучэнні па падрыхтоўцы і прымяненні ядзерных сіл
Мінабароны РФ. Фота ТАСС 19 мая, Мінск /Кар. БЕЛТА/. Узброеныя сілы Расійскай Федэрацыі (УС РФ) у перыяд з 19 па 21 мая праводзяць вучэнні па падрыхтоўцы і прымяненні ядзерных сіл ва ўмовах пагрозы агрэсіі. Аб гэтым паведамляе БЕЛТА са спасылкай на Мінабароны Расіі.
Паводле даных расійскага ведамства, да ўдзелу ў вучэннях прыцягнуты Ракетныя войскі стратэгічнага прызначэння, Паўночны і Ціхаакіянскі флаты, Камандаванне далёкай авіяцыі, частка сіл Ленінградскай і Цэнтральнай ваенных акруг.
Мэтамі вучэнняў у расійскім ведамстве назвалі ўдасканаленне навыкаў работы кіруючага і аператыўнага складу, арганізацыі кіравання падпарадкаванымі войскамі (сіламі) пры падрыхтоўцы і ў ходзе рэалізацыі мерапрыемстваў стрымлівання магчымага праціўніка; праверка ўзроўню падрыхтаванасці органаў ваеннага кіравання, войскаў (сіл), якія прыцягваюцца да вырашэння задач па прадухіленні агрэсіі; практычная адпрацоўка органамі ваеннага кіравання, злучэннямі і воінскімі часцямі пытанняў арганізацыі кіравання, узаемадзеяння і ўсебаковага забеспячэння ў ходзе выканання задач па прызначэнні; ацэнка здольнасці войскаў (сіл), якія прыцягваюцца да вучэння, вырашаць задачы па прызначэнні.
У ходзе практычных дзеянняў войскаў плануюцца мерапрыемствы па прывядзенні ў гатоўнасць да выканання задач шэрага злучэнняў і воінскіх часцей ядзерных сіл і іх усебаковага забеспячэння, а таксама правядзенні пускаў балістычных і крылатых ракет па палігонах на тэрыторыі Расійскай Федэрацыі.
Усяго да вучэння будзе прыцягнута больш як 64 тыс. асабовага складу, больш як 7,8 тыс. адзінак узбраенняў, ваеннай і спецыяльнай тэхнікі, у тым ліку звыш 200 ракетных пускавых установак, больш як 140 лятальных апаратаў, 73 надводныя караблі і 13 падводных лодак, з якіх 8 ракетных падводных лодак стратэгічнага прызначэння.
Таксама ў ходзе вучэння будуць адпрацаваны пытанні сумеснай падрыхтоўкі і прымянення ядзернай зброі, размешчанай на тэрыторыі Рэспублікі Беларусь.-0-
