«Гэта свята з душой». Як у Калінкавічах адзначаюць абласныя «Дажынкі-2026»
10 кастрычніка, Калінкавічы . З душэўнай цеплынёй і па хлебасольных традыцыях ушаноўваюць аграрыяў на абласным фестывалі-кірмашы «Дажынкі-2026», ствараючы атмасферу сапраўднага свята. Жыхары і госці райцэнтра падзяліліся эмоцыямі з карэспандэнтам БЕЛТА.
Калінкавічы сёння гасцінна сустракаюць працаўнікоў вёскі з усяго паўднёва-ўсходняга рэгіёна. Да гэтага дня райцэнтр рыхтаваўся грунтоўна: ад маштабнага добраўпарадкавання да насычанай святочнай праграмы.
У сталіцы абласных «Дажынак» сёлета правялі комплекснае абнаўленне, якое закранула аб’екты розных сфер. Пасля рамонту, мадэрнізацыі, рэканструкцыі горад сустракае свята аграрыяў у новым абліччы.
Настрой задаюць тэматычныя экспазіцыі і лакацыі. Падворкі з розных раёнаў прадстаўляюць свае візуальныя, хлебасольныя і творчыя візітныя карткі. Яны паказваюць традыцыі, культуру, эканамічны патэнцыял. Гэтай раніцай у цэнтральнай частцы Калінкавіч разгарнулася выстаўка сельскагаспадарчай тэхнікі. Фестывальныя лакацыі запрашаюць на дэгустацыі, фуд-корты, вабяць водарам гандлёвыя рады.
Андрэй Герко прыйшоў на свята разам са сваёй дачкой Ульянай. Ён пераехаў у Калінкавічы з Маладзечна ў 2010 годзе. За гэтыя 15 гадоў раённы цэнтр заўважна змяніўся, асабліва за апошнія месяцы. «Дарогі абнавілі, жылым кварталам удзялілі ўвагу — усюды прыгажосць і парадак», — адзначыў ён змяненні ў горадзе.
«Гэта важнае свята, даўняя традыцыя. Выдатна, што ў нас у Беларусі з году ў год прадаўжаюць такія традыцыі. Гэта значны дзень, урачыстасць для аграрыяў, якія штодзённай працай уносяць уклад у харчовую бяспеку нашай краіны. І сёння, заканчваючы аграрны год, яны радуюцца ад душы. Гэта свята з душой. Гэта відаць, гэта адчуваецца», — сказаў ён.
І дзевяцігадовай Ульяне цікава на свяце «Дажынкі». «Тут сапраўдны кірмаш, столькі шмат усяго на падворках, нават настрой узняўся», — дадала дзяўчынка.
Жыхарка Калінкавіч Маргарыта Булаўка таксама прыйшла на абласное свята са сваімі роднымі. «Наш горад вельмі змяніўся перад «Дажынкамі». Стаў яшчэ больш прывабным. Вельмі шмат абнаўленняў адбылося. Усё вельмі прыгожа. Адчуваю гонар, што свята такога ўзроўню праходзіць у нас, столькі шмат гасцей прыехала. Яны ўбачаць нашы Калінкавічы ва ўсёй красе. І свята вельмі каларытнае, яркае. Дзякуючы яму шмат людзей з іншых раёнаў і абласцей даведаюцца больш пра наш любімы горад», — падзялілася яна.
Таксама жыхарка райцэнтра падкрэсліла значнасць свята. «Вядома, гэта і выдатная нагода ад душы падзякаваць хлебаробам. Дзякуючы іх працы ў нас ёсць хлеб на сталах. Гэта вельмі цяжкая і адказная праца», — акцэнтавала жанчына.
Да самага вечара ў гонар хлебаробаў гучаць віншаванні з галоўнай сцэны свята. У канцэртнай праграме — музычныя падарункі ад лепшых творчых калектываў вобласці, гасцей. У фінале — «КаверХорШоу». Яркім акордам фестывалю стане святочны феерверк.
