Дызайн анімацыі для СМІ і спецыяльнасць для МУС. Што новага з’явіцца ў гэтым годзе ў каледжах Беларусі
Навіны сюжэта «Праект «Краіна гаворыць»» У Беларусі плануюць пашырыць пералік спецыяльнасцей з аплатнымі практыкамі ў каледжах У Мінадукацыі расказалі, колькі абітурыентаў паступяць у ВНУ без экзаменаў 10 чэрвеня, Мінск . Якія новыя спецыяльнасці адкрыюць у каледжах Беларусі ў гэтым годзе, расказала намеснік начальніка галоўнага ўпраўлення прафесійнай адукацыі — начальнік упраўлення прафесійна-тэхнічнай і сярэдняй спецыяльнай адукацыі Міністэрства адукацыі Аляксандра Пятрова ў праекце БЕЛТА «Краіна гаворыць».
Паводле слоў Аляксандры Пятровай, з кожным годам попыт абітурыентаў на ўзроўні прафесійна-тэхнічнай і сярэдняй спецыяльнай адукацыі, а таксама попыт эканомікі краіны ўсё больш збліжаюцца. «Запатрабаванымі спецыяльнасцямі традыцыйна з’яўляюцца медыцынскія, спецыяльнасці сферы IT, сферы мастацтва. Але ўжо некалькі гадоў павышаецца цікавасць патэнцыяльных абітурыентаў, напрыклад, да спецыяльнасцей сферы машынабудавання, асабліва да тых спецыяльнасцей, якія ажыццяўляюць падрыхтоўку кадраў для аўтаматызаванай вытворчасці, для эксплуатацыі мехатронных сістэм, — расказала яна. — Сумеснымі намаганнямі арганізацый — заказчыкаў кадраў і ўстаноў адукацыі мы спрабуем сарыентаваць нашых патэнцыяльных абітурыентаў на тыя рабочыя месцы, якія сапраўды дадуць ім магчымасць рэалізоўвацца і атрымліваць кампетэнцыі, якія патрэбны на прадпрыемствах, што валодаюць новымі тэхналогіямі, высокатэхналагічным абсталяваннем». 
На ўзроўні сярэдняй спецыяльнай і прафесійна-тэхнічнай адукацыі штогод з’яўляюцца новыя спецыяльнасці. «У гэтым годзе таксама ёсць шэраг новых спецыяльнасцей на ўзроўні ССА. Гэта, напрыклад, эксплуатацыя абсталявання радовішчаў нафты і газу, забеспячэнне дзейнасці па рабоце з суб’ектамі права. У гэтым годзе адраджаецца падрыхтоўка кадраў для сістэмы Міністэрства ўнутраных спраў. Анансавана адкрыццё новага каледжа МУС і вяртанне ў сістэму сярэдняй спецыяльнай адукацыі адпаведнай спецыяльнасці — «прававое забеспячэнне грамадскай бяспекі». Падрыхтоўка будзе ажыццяўляцца непасрэдна ў Мінскай вобласці. Гэты каледж ужо ажыццяўляе прафадбор сваіх абітурыентаў на працягу года. Гэта людзі, якія арыентаваны і матываваны на канкрэтную спецыяльнасць і службу ў органах Міністэрства ўнутраных спраў», — дадала Аляксандра Пятрова. 
Акрамя гэтага, з’явіцца спецыяльнасць «дызайн анімацыі для сродкаў масавай інфармацыі», накіраваная на арганізацыі, зацікаўленыя ў падрыхтоўцы адпаведных спецыялістаў. Таксама адкрываецца спецыяльнасць «кіраванне продажамі».
На ўзроўні прафесійна-тэхнічнай адукацыі з’явіліся новыя кваліфікацыі. «На ўзроўні прафесійна-тэхнічнай адукацыі вельмі гібкі падыход: мы штогод абнаўляем пералік кваліфікацый, па якіх ажыццяўляецца прыём на аснове дадатковай патрэбнасці арганізацыі — заказчыка кадраў канкрэтнага рэгіёна. На сённяшні дзень у нас таксама скарэкціраваны прыём — па 90 кваліфікацыях мы спыняем прыём або прыпыняем яго ў гэтым годзе, а таксама адкрываем падрыхтоўку па 93 новых для асобных устаноў адукацыі кваліфікацыях, — растлумачыла намеснік начальніка. — Як гэта працуе? Базавая арганізацыя гаворыць, што праз тры гады ёй нейкая кваліфікацыя ў такім аб’ёме будзе, скажам так, не патрэбна. Таму прыём можа быць прыпынены. Але, магчыма, калі вытворчасць пашырыцца, з’явіцца заказ, то праз год мы адновім гэту падрыхтоўку. Такім чынам, з сістэмы кваліфікацыі цалкам не выпадаюць. Проста асобныя ўстановы адукацыі за кошт гэтай карэкціроўкі арыентуюцца на рэгіянальную патрэбнасць і на патрэбнасць канкрэтных базавых арганізацый».
*Праект створаны за кошт сродкаў мэтавага збору на вытворчасць нацыянальнага кантэнту.
Фота Хрысціны Аксёнавай
