Цэх штампоўкі будуецца на «БЕЛДЖЫ»: пляцоўку наведаў прэм’ер-міністр
4 верасня, Барысаўскі раён . Прэм’ер-міністр Беларусі Аляксандр Турчын наведаў СЗАТ «БЕЛДЖЫ», у тым ліку пляцоўку будаўніцтва цэха штампоўкі,
Гэта другая за год рабочая паездка кіраўніка ўрада на завод. У красавіку галоўнай тэмай былі вынікі работы прадпрыемства за 2025 год і перспектывы развіцця айчыннага легкавога аўтамабілебудавання. Пры гэтым наведванне «БЕЛДЖЫ» было звязана і з абмеркаваннем планаў развіцця, у першую чаргу будаўніцтва ўласнага цэха штампоўкі, які павінен пачаць працаваць у канцы 2027 года. Гэта дасць магчымасць нарасціць аб’ёмы вытворчасці і павялічыць лакалізацыю. Сёння на парадку дня — ацэнка праведзенай работы і паказчыкаў дзейнасці завода.
Як адзначыў дырэктар СЗАТ «БЕЛДЖЫ» Генадзь Свідзерскі, за час работы завода выпушчана больш як 400 тыс. машын, з іх больш як 100 тыс. прададзена ў Беларусі. «Мы пастаянна займаемся абнаўленнем, мадэрнізацыяй, рэканструкцыяй. У мінулым годзе мы правялі мадэрнізацыю цэха афарбоўкі. І калі ў 2018 годзе праектная магутнасць нашага завода была 60 тыс. машын пры двухзменным рэжыме работы, то цяпер гэта магутнасць па цэху афарбоўкі павялічана ў два разы, значыць, цяпер гэта 120 тыс. Каб гэтага дасягнуць, трэба было абнавіць абсталяванне, цяпер прымяняецца самая сучасная тэхналогія, мы атрымалі павышэнне прадукцыйнасці і энергазберажэнне. Каб збалансаваць гэтыя магутнасці, рэканструявалі і цэх зваркі. У 2018 годзе ў нас было каля 35 робатаў, пасля рэканструкцыі мінулага года іх ужо стала 70, гэта значыць у два разы больш. На гэтым рэканструкцыя не спыняецца, і мы ў бягучым годзе пачалі будаўніцтва штамповачнай вытворчасці. Краіна ў нас машынабудаўнічая, а аўтаматызаванай штамповачнай вытворчасці буйнагабарытных дэталей няма нідзе. Таму ўзнікла думка пабудаваць такую вытворчасць», — сказаў ён.
Уласная штампоўка, паводле слоў дырэктара, дасць шэраг пераваг. «Металічныя дэталі кузава — гэта самыя габарытныя дэталі, якія пастаўляюцца ў рамках машынакамплекта. Калі мы пабудуем штамповачную вытворчасць, колькасць кантэйнераў, неабходных для пастаўкі сюды з Кітая, зменшыцца на 70%. Будзем з металу штампаваць у сябе тут уласныя дэталі. А каб гэтыя дэталі яшчэ пападалі на канвеер далей, адначасова праводзім рэканструкцыю цэха зваркі. Калі ў мінулым годзе мы павялічылі колькасць робатаў да 70, то калі закончацца работы па цэху штампоўкі, то ў нас іх стане ўжо 150. Работы пачаты ў чэрвені. Ідзе мантаж металаканструкцый, пачынаем ужо закрываць дах. Плануем за верасень-кастрычнік так арганізаваць будаўнічыя работы, каб можна было працаваць ужо ўнутры гэтых памяшканняў. І ў 2027 годзе ў планах пачаць мантаж абсталявання, каб запусціць штамповачную вытворчасць. Гэта дасць магчымасць, па-першае, эканоміць на лагістыцы, па-другое, павысіць ступень лакалізацыі, па-трэцяе, гэта, у прынцыпе, завяршае стварэнне завода поўнага цыкла. Далей проста патрэбны айчынныя кампаненты, а на гэтым заводзе ўжо ўсё неабходнае будзе зроблена», — падкрэсліў Генадзь Свідзерскі.
СЗАТ «БЕЛДЖЫ» за восем месяцаў 2026 года вырабіла 73 673 аўтамабілі на суму 3856,5 млн рублёў. На экспарт рэалізавана 42 147 аўтамабіляў на суму $690 млн. На ўнутраным рынку — 32 916 адзінак на суму 1930 млн рублёў. 
Фота Андрэя Сіняўскага
