Больш як 73 працэнты рэк і азёр маюць добры і высокі экалагічны статус — Белгідрамет
Фота з архіва 20 ліпеня, Мінск . У Беларусі 73,6 працэнта паверхневых водных аб’ектаў маюць добры і высокі экалагічны статус. Аб гэтым на прэс-канферэнцыі паведаміла вядучы інжынер службы экалагічнай інфармацыі Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Паліна Пальчах,
«Вынікі назіранняў за першае паўгоддзе 2026 года сведчаць, што стан паверхневых вод добры. Большасць назіраемых гідрахімічных паказчыкаў якасці вады паверхневых водных аб’ектаў у асноўным знаходзіцца ў межах устаноўленых нарматываў якасці», — адзначыла Паліна Пальчах.
Назіранні за станам паверхневых вод вядуцца з 1947 года. «Маніторынг паверхневых вод праводзіцца ў басейнах рэк Заходняя Дзвіна, Нёман, Заходні Буг, Днепр і Прыпяць», — дадала яна.
Паводле яе слоў, асноўнымі паказчыкамі, па якіх фіксуецца перавышэнне нарматываў, з’яўляюцца біягенныя рэчывы, радзей — павышаная канцэнтрацыя арганічных рэчываў і металаў. «Пры гэтым перавышэнне, як правіла, нязначнае», — падкрэсліла спецыяліст. Найбольш часта яны фіксуюцца ў басейнах рэк Заходні Буг, Днепр і Прыпяць.
Начальнік службы радыяцыйнага маніторынгу Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Алег Дзюбайла адзначыў, што новых ачагоў забруджвання тэрыторый пасля аварыі на Чарнобыльскай АЭС не з’явілася. Найбольш пацярпелымі тэрыторыямі ён назваў Гомельскую і часткова Магілёўскую вобласці. Самымі чыстымі рэгіёнамі Беларусі, паводле слоў спецыяліста, з’яўляюцца Віцебская і Гродзенская вобласці.
Начальнік службы экалагічнай інфармацыі Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Алена Мельнік звярнула ўвагу, што ёсць пералік гарадоў, дзе не фіксуюцца перавышэнні ўстаноўленых нарматываў. «Гэта з году ў год Барысаў, Ліда, Рэчыца. Але ў нас для кожнага горада ёсць свой пералік параметраў. Гэта значыць у гарадах, дзе больш развіта прамысловасць, пералік пашыраны», — растлумачыла яна.
Падрабязную інфармацыю аб выніках маніторынгу можна знайсці на сайце Белгідрамета і на партале NSMOS.
