Беларусь прапануе Мазамбіку пастаўкі абсталявання і дапамогу ў падрыхтоўцы спецыялістаў для энергетыкі
Фота Мінэнерга 2 кастрычніка, Мінск . Якія беларускія тэхналогіі і кампетэнцыі могуць быць запатрабаваны пры развіцці энергетычнай інфраструктуры Мазамбіка, абмяркоўвалася ў час перагавораў міністра энергетыкі Беларусі Дзяніса Мароза з міністрам мінеральных рэсурсаў і энергетыкі Мазамбіка Эстэваа Томашам Рафаэлем Пале, паведамілі ў прэс-службе Мінэнерга.
Беларусь гатова прапанаваць не асобныя пастаўкі, а комплекс кампетэнцый: праектаванне і будаўніцтва электрасеткавых аб’ектаў, мадэрнізацыю і лічбавізацыю сетак, пастаўкі трансфарматарнага і кабельнага абсталявання, а таксама падрыхтоўку спецыялістаў.
Адзін з перспектыўных напрамкаў — супрацоўніцтва непасрэдна прадпрыемстваў дзвюх краін. У ходзе візіту мазамбікскай дэлегацыі беларускі бок прадстаўляе магчымасці Мінскага электратэхнічнага завода імя Казлова і ВА «Энергакамплект». Абмяркоўваюцца патэнцыяльныя пастаўкі трансфарматарнага і кабельна-правадніковага абсталявання.
Таксама разглядалася пытанне падрыхтоўкі кадраў для энергасістэмы Мазамбіка. Беларускі бок гатовы арганізаваць навучанне і вытворчыя стажыроўкі інжынернага і дыспетчарскага персаналу на базе арганізацый «Белэнерга».
Яшчэ адзін пункт узаемадзеяння — газавая сфера. Бакі абмеркавалі магчымасці выкарыстання беларускіх кампетэнцый з улікам значнага рэсурснага патэнцыялу Мазамбіка і працяг прамых кантактаў паміж профільнымі арганізацыямі.
Знаёмства з беларускімі кампетэнцыямі прадоўжыцца непасрэдна на прадпрыемствах і энергааб’ектах. Праграмай візіту прадугледжаны наведванні МЭТЗ імя Казлова, ВА «Энергакамплект», Віцебскай ГЭС і шэрага іншых прамысловых прадпрыемстваў краіны.
